გამოძიების ფარგლებში დაკითხულია ცესკო-ს არაერთი წარმომადგენელი, საქმეზე ძიება გრძელდება და გამოიკითხება ყველა ის პირი, ვისაც რაიმე ტიპის შემხებლობა აქვს საქმესთან, – ამის შესახებ არჩევნების გაყალბების საქმესთან დაკავშირებით დაწყებული გამოძიების პროკურორმა, ლაშა ცქვიტარიამ განაცხადა.

პროკურორის თქმით, აქტიურად მიმდინარეობს საგამოძიებო და საპროცესო მოქმედებები, მათ შორის ხდება იმ პირების დაკითხვა, ვინც შეიძლება, ფლობდეს რაიმე სახის ინფორმაციას აღნიშნულ საკითხზე.

„გამოძიების ფარგლებში მიმდინარეობს კონკრეტული საგამოძიებო მოქმედებები. კონკრეტულ ინფორმაციას დაკითხული პირების და მათი ვინაობის შესახებ ვერ მოგაწვდით, თუმცა გიდასტურებთ, რომ გამოძიების ფარგლებში დაკითხულია ცესკო-ს არაერთი წარმომადგენელი. საქმესთან დაკავშირებით მაგისტრი მოსამართლის წინაშე გაიარა გასაუბრების პროცესი კოალიცია „ძლიერი საქართველოსთვის“ ერთ-ერთმა ლიდერმა, საბა ბუაძემ. ამ დროისთვის გამოძიების კითხვებს პასუხობს პარტია „ახალის“ ლიდერი თენგო თევზაძე“, – განაცხადა პროკურორმა.