ჩემპიონთა ლიგის მესამე საკვალიფიკაციო ეტაპზე ლაშა დვალის აპოელ-ისა და გურამ კაშიას „სლოვანის“ დაპირისპირება ფრედ დასრულდა და სლოვაკეთის ჩემპიონი პლეი ოფში გავიდა.

პირველი შეხვედრა ბრატისლავაში ვლადიმირ ვაისის გუნდმა 2:0 მოიგო და საპასუხო მატჩამდე, რომელიც ნიქოზიაში გაიმართა, კომფორტული უპირატესობა მოიპოვა.

ორივე ქართველი ფეხბურთელი თავისი გუნდის ძირითად შემადგენლობაში იყო და შეუცვლელად ითამაშა.

მე-80 წუთზე კვიპროსის ჩემპიონის ნახევარმცველმა, რადოსლავ პეტროვიჩმა მეორე ყვითელი ბარათი მიიღო და აპოელ-ი უმცირესობაში დარჩა, რამაც „სლოვანს“ მიზნის მიღწევა გაუმარტივა.

საბოლოოდ, ორი მატჩის ჯამში გურამ კაშიას „სლოვანმა“ 2:0 (2:0, 0:0) მოიგო და ჩემპიონთა ლიგის პლეი ოფშია, ხოლო დვალის აპოელ-ი ევროპის ლიგის პლეი ოფში გადაინაცვლებს.