გიორგი მიქაუტაძე 2024 წლის ევროპის ჩემპიონატის თანაბომბარდირი და „ოქროს ბუცის“ მფლობელი გახდა.

ტურნირის ისტორიაში ეს პირველი შემთხვევაა, როდესაც საუკეთესო მეგოლე ქართველი ფეხბურთელი გახდა. გიორგი მიქაუტაძემ 3 გოლი გაიტანა, ისევე როგორც კიდევ ხუთმა სხვა მოთამაშემ. ქართველმა თავდამსხმელმა სამივე ჯგუფურ შეხვედრაში გამოიჩინა თავი – თურქეთთან, ჩეხეთთან, პორტუგალიასთან და მერვედფინალამდე ლიდერობდა.

გიორგის „ოქროს ბუცისთვის“ ბრძოლაში შემდეგ სხვები წამოეწივნენ. ქართველის გადასწრება ფინალის მონაწილეებს, ინგლისის ნაკრების კაპიტანს, ჰარი კეინსა და ესპანელთა შემტევს, დანი ოლმოს შეეძლოთ. თუმცა, თამაში ისე დასრულდა, თავი ვერც ერთმა გამოიჩინა და ქართული ფეხბურთის ისტორიაში ერთ-ერთი საამაყო ფურცელი დაიწერა – ევრო 2024-ის თანაბომბარდირი ქართველი თავდამსხმელია.

აქვე ვიტყვით, რომ ასაკობრივი ევროპის ჩემპიონატების ბომბარდირის წოდება ქართველ თავდამსხმელებს მოპოვებული აქვთ – ვალერი გაგუას (3 გოლით) და სანდრო იაშვილს (4 გოლით).

ევრო 2024-ის „ოქროს ბუცი“

გიორგი მიქაუტაძე, საქართველო 3 (4 მატჩი)

ივან შრანცი, სლოვაკეთი 3 (4 მატჩი)

ჯამალ მუსიალა გერმანია 3 (5 მატჩი)

ჰარი კეინი, ინგლისი 3 (6 მატჩი)

დანი ოლმო, ესპანეთი 3 (6 მატჩი)

კოდი გაკპო, ნიდერლანდები 3 (6 მატჩი)