ევროკავშირი ფინანსურ და ტექნიკურ მხარდაჭერას გაუწევს „მწვანე დერეფნის“ პროექტების განხორციელებას სამხრეთ კავკასიიდან – ამის შესახებ ევროკომისარმა სამეზობლო და გაფართოების საკითხებში, ოლივერ ვარჰეიმ, ბაქოში კასპიის მე-12 ენერგეტიკული ფორუმის მონაწილეებისადმი მიმართვის დროს განაცხადა.

ევროკომისარმა აღნიშნა სამხრეთ კავკასიისა და ცენტრალური აზიის რეგიონის მნიშვნელოვანი როლი ენერგეტიკული და სატრანსპორტო დერეფნების განხორციელებაში, რომლებიც უმნიშვნელოვანესია ევროკავშირისთვის.

ვარჰეის განცხადებით, ბრიუსელი ასევე დაეხმარება შუა დერეფნის განხორციელებას ევროკავშირის სტრატეგიის ფარგლებში. ევროკომისარმა აღნიშნა ევროპაში აზერბაიჯანული გაზის მიწოდების გაზრდის მნიშვნელობა, რუსეთიდან გაზის მიწოდების შემცირების გათვალისწინებით.