ოკუპირებული აფხაზეთის ე.წ. პრეზიდენტი ასლან ბჟანია სამუშაო ვიზიტით რუსეთში იმყოფება.

დეფაქტო ლიდერის პრესსამსახურის ცნობით, ვიზიტის დროს ის განიხილავს „რესპუბლიკის ცხოვრებასთან და სხვადასხვა სფეროში აფხაზურ-რუსეთის თანამშრომლობის განვითარების უამრავ საკითხს“.

19 მარტს ბჟანიამ შეხვედრა გამართა რუსეთის პრეზიდენტის ადმინისტრაციის ხელმძღვანელთან, ანტონ ვაინოსთან, რომელზეც „განიხილეს აფხაზეთსა და რუსეთს შორის სოციალურ-ეკონომიკური ურთიერთქმედების აქტუალური საკითხები“.

დღეს ბჟანია რუსეთის უშიშროების საბჭოს მდივნის პირველ მოადგილეს რაშიდ ნურგალიევს შეხვდა. ამის შესახებ იტყობინება რუსეთის უშიშროების საბჭო.

„განხილული იქნა რუსეთ-აფხაზური თანამშრომლობის შემდგომი გაღრმავების საკითხები უსაფრთხოებისა და ეკონომიკის სფეროში, აქცენტი კონკრეტული ერთობლივი პროექტების განხორციელებაზე“, - ნათქვამია განცხადებაში.