საქართველოს პირველმა ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა, საქართველოს პრემიერ-მინისტრ ირაკლი კობახიძესთან ერთად, ანაკლიის ღრმაწყლოვანი ნავსადგურის საზღვაო ინფრასტრუქტურის პროექტირება-მშენებლობის დაწყებასთან დაკავშირებულ ღონისძიებაში მიიღო მონაწილეობა.

„ანაკლიის ღრმაწყლოვანი პორტი ჩვენი გრძელვადიანი ხედვის მნიშვნელოვანი ნაწილია – ეს არ არის მხოლოდ სატრანსპორტო-ლოგისტიკური ინფრასტრუქტურის, არამედ მთლიანად ქვეყნის სივრცითი განვითარების მნიშვნელოვანი შემადგენელი ნაწილი, ეკონომიკური აქტივობის მნიშვნელოვანი ცენტრი მთლიანად ქვეყნისთვის და განსაკუთრებით სამეგრელოს რეგიონისთვის“, – განაცხადა ლევან დავითაშვილმა სიტყვით გამოსვლისას.

ეკონომიკის სამინისტროს ინფორმაციით, ანაკლიის ღრმაწყლოვანი ნავსადგურის ინფრასტრუქტურის პროექტირება-მშენებლობას, კერძოდ, ნავსადგურის აკვატორიის ზღვის ფსკერის დაღრმავებას და „ტალღმტეხელის“ მოწყობის სამუშაოებს ბელგიური კომპანია Jan De Nul N.V. ასრულებს, რომელიც სწორედ საზღვაო-სამშენებლო სამუშაოებზეა სპეციალიზებული და არაერთი მასშტაბური პროექტი აქვს განხორციელებული მთელ მსოფლიოში.

ლევან დავითაშვილის თქმით, სექტემბრის თვეში კომპანიამ დაიწყო გეოლოგიური შესწავლის სამუშაოები, ასევე პარალელურად მიმდინარეობს დეტალური პროექტირება და მალე დაღრმავებითი სამუშაოების, მნიშვნელოვანი საზღვაო ინფრასტრუქტურის სამშენებლო ეტაპი დაიწყება.

პირველმა ვიცე-პრემიერმა ისაუბრა ანაკლიის ღრმაწყლოვანი ნავსადგურის მნიშვნელობაზე ტრანს-ევროპულ სატრანსპორტო ქსელში (TEN-T) და საერთაშორისო სატრანსპორტო სისტემებში საქართველოს ინტეგრაციის კუთხით. მისი შეფასებით, ნავსადგური სერიოზული სტიმული იქნება ქვეყანაში წარმოების განვითარების, საგარეო ვაჭრობის გაფართოების, ზოგადად, ეკონომიკური ზრდისთვის თვალსაზრისით.

როგორც აღინიშნა, პირველ ფაზაში პროექტის გამტარუნარიანობა 600 000 კონტეინერი იქნება, პორტი დაახლოებით 8 მლნ ტონა ტვირთის გატარებას შეძლებს.

ამასთან, ლევან დავითაშვილის ინფორმაციით, ბოლო წლებში საქართველოს დადებითი დინამიკა აქვს საერთაშორისო გადაზიდვებში – 2019 წელთან შედარებით, ტვირთნაკადი 37%-ით არის გაზრდილი. ასევე, ისტორიულ მაქსიმუმზეა საქართველოს ნავსადგურებში კონტეინერების გადამუშავების მაჩვენებელი – 2023 წელს ბათუმის და ფოთის ნავსადგურების მიერ ჯამში 701 ათასზე მეტი კონტეინერი (TEU) გადამუშავდა, რაც 47%-ით აღემატება 2022 წლის მონაცემებს.

როგორც ლევან დავითაშვილმა აღნიშნა, ანაკლიის პორტის ამოქმედება ასევე ახალ ბიძგს მისცემს შავ ზღვაზე საბორნე მიმოსვლის განვითარებას, რაც მთავრობის კიდევ ერთი პრიორიტეტია, რადგან უმოკლეს გზას წარმოადგენს ევროკავშირის ქვეყნებთან დასაკავშირებლად.

„ჩვენ ხშირად ვსაუბრობთ საქართველოს უნიკალურ გეოპოლიტიკურ მდებარეობაზე. ანაკლიის ღრმაწყლოვანი ნავსადგურის განვითარება იქნება მნიშვნელოვანი ქვაკუთხედი სწორედ „შუა დერეფნის“ ინფრასტრუქტურის განვითარების კუთხით, დერეფნის მთლიანად კონკურენტუნარიანობის ასამაღლებლად და საქართველოს როლის გასაზრდელად“, – განაცხადა ლევან დავითაშვილმა.

ლევან დავითაშვილმა ასევე ყურადღება გაამახვილა ანაკლიის პროექტის დიდ სოციალურ დატვირთვაზე ქვეყნისა და ადგილობრივი მოსახლეობისთვის. მისი ინფორმაციით, პირველი ფაზის დროს, უშუალოდ მშენებლობის პროცესში 500-ზე მეტი ადამიანის დასაქმება იგეგმება, პორტის ოპერირების პროცესში კიდევ შეიქმნება 300-ზე მეტი პირდაპირი სამუშაო ადგილი, რასაც ემატება ლოგისტიკის სფეროში დამატებით 1700 სამუშაო ადგილი.

პირველი ვიცე-პრემიერის შეფასებით, ეს იქნება მნიშვნელოვანი უნიკალური ეკოსისტემა როგორც მთელი ქვეყნის ეკონომიკისთვის, ისე განსაკუთრებით რეგიონისთვის. ამასთან, ლევან დავითაშვილის ინფორმაციით, დაწყებულია მუშაობა ტვირთმფლობელებთან და გადამზიდავ კომპანიებთან, რათა პროექტი წარმატებული, კომერციულად მდგრადი და გრძელვადიანად კონკურენტუნარიანი იყოს. მისი ინფორმაციით, ეკონომიკისა და მდგრადი განვითარების სამინისტრომ უკვე დაიწყო მოლაპარაკებები მნიშვნელოვან ოპერატორებთან, კომერციულ აგენტებთან.

„სამინისტრო უკვე რამდენიმე დღეში იწყებს მემორანდუმების გაფორმებას მსხვილ გადამზიდავ და ტვირთმფლობელ კომპანიებთან, რაც ანაკლიის მიზიდულობას კიდევ უფრო გაზრდის. პროექტის განხორციელებას წინ არაფერი უდგას, ჩვენ დაპირებებს ვასრულებთ, პროექტი გეგმაზომიერად მიმდინარეობს და მაქსიმუმ 2029 წლისთვის შევძლებთ პირველი გემების მიღებას ანაკლიის ღრმაწყლოვან პორტში. თუმცა, მაქსიმალურად ვიქნებით მობილიზებული, რათა ეს პროცესი უფრო დავაჩქაროთ“, – განაცხადა ლევან დავითაშვილმა.

ღონისძიების ფარგლებში კომპანია Jan De Nul-სა და საქართველოს ეკონომიკისა მდგრადი განვითარების სამინისტროს შორის თანამშრომლობის მემორანდუმი გაფორმდა. ეკონომიკის სამინისტროს ინფორმაციით, დოკუმენტის თანახმად, ბათუმის სახელმწიფო საზღვაო აკადემიის სტუდენტებს მიეცემათ უნიკალური შესაძლებლობა, პრაქტიკა გაიარონ კომპანიის საკუთრებაში არსებულ გემზე, რომელიც ანაკლიაში დაღრმავებით სამუშაოებზე იმუშავებს.