„ნაპოლიმ“ სერია A-ს ბოლო ტურის მატჩში „სამპდორიას“ დაუპირისპირდა და 2:0 დაამარცხა. 

კვარაცხელიამ თანაგუნდელებთან ერთად სეზონი გამარჯვებით დაასრულა. მატჩის შემდეგ შთამბეჭდავი ღონისძიება გაიმართა. ოქროს მედლით დაჯილდოვდნენ როგორც ფეხბურთელები, ისე კლუბის ყველა წარმომადგენელი.

მედლების გადაცემის შემდეგ კი სეზონის ტრიუმფატორებმა სერია A-ს მოგების თასი აღმართეს, ხოლო დიეგო მარადონას სახელობის სტადიონი შთამბეჭდავი, ფერადი ფოიერვერკით განათდა.

აღსანიშნავია, რომ მატჩის დაწყებამდე „სტადიო მარადონაზე“ „ნაპოლის“ ქართველ თავდამსხმელს სერია A-ს საუკეთესო მოთამაშის ჯილდო გადასცეს.

ხვიჩა კვარაცხელიამ, რომელიც სეზონის საუკეთესო ფეხბურთელი გახდა, პირველი კომენტარი გააკეთა და განვლილ სეზონზე ისაუბრა, გუნდს კი მადლობა გადაუხადა.

„პირველ რიგში, მინდა მადლობა გადავუხადო ჩემს თანაგუნდელებს, „ნაპოლის“, მთელ პერსონალს, მათ გარეშე ვერასოდეს მოვიპოვებდი სკუდეტოს და წლის MVP ტიტულს. ეს ჯილდო მხოლოდ მე არ დავიმსახურე, თანაგუნდელების გარეშე ვერასოდეს მოვიგებდი, ისინი თავდაჯერებულობას მმატებდნენ, რომ უკეთ მეთამაშა.

სეზონის საუკეთესო ეპიზოდი? როდესაც ჩვენ მოვიგეთ „უდინეზესთან“ და სკუდეტო გავინაღდეთ, ეს წარმოუდგენელი სიხარული იყო. თანაც ჩემპიონები ნეაპოლში ჩემს პირველივე სეზონში გავხდოთ. ამ წარმატებას გულშემატკივრები 33 წელი ელოდნენ, მაგრამ ეს არის მხოლოდ პირველი ნაბიჯი შემდგომი წარმატებისკენ.

ვამაყობ იმ გულშემატკივრებით, რომლებიც საქართველოდან ჩემს გამო ჩამოდიან, მადლობას ვუხდი მათ, მაგრამ ისინი მხოლოდ ჩემს გამო არ მოდიან, არამედ „ნაპოლის“ საგულშემატკივროდ. მათ არა მარტო მე შემიყვარეს, არამედ შეუყვარდათ ნეაპოლიც. ეს ხალხია ჩემი მოტივაციაა. მთელ სეზონი ასეთ დიდ მხარდაჭერას ძალიან ვაფასებ.

მე ვარ ლიდერი? ვფიქრობ, რომ ამ გუნდში ბევრი ლიდერია, ოსიმენი, დი ლორენცო… ვაკეთებ იმას, რაც უნდა გავაკეთო მოედანზე. არ ვიცი, ვარ თუ არა ლიდერი, მაგრამ ვიცი, რომ მომავალში ვეცდები, თამაში გავაუმჯობესო. შეგვიძლია თუ არა გუნდის მომავალს ოპტიმიზმით შევხედოთ? რა თქმა უნდა, პოზიტიურად ვარ განწყობილი. რაც შემეხება პირადად მე, მიყვარს ნეაპოლი“, – განაცხადა ხვიჩა კვარაცხელიამ.

კვარაცხელიამ სერია A-ს მიმდინარე გათამაშებაში 33 მატჩი ჩაატარა, 12 გოლი გაიტანა და 10 საგოლე გადაცემა მიითვალა.