ევროსაბჭოს გენერალური მდივანი შეშფოთებას გამოთქვამს საქართველოს მთავრობის მიერ „უცხოური გავლენის“ შესახებ კანონში ცვლილებების შეტანაზე უარის გამო, - ნათქვამია ევროსაბჭოს მიერ გავრცელებულ განცხადებაში.

,,3 თებერვალს, ევროპის საბჭოს გენერალური მდივანი ალენ ბერსეტი საქართველოს პრემიერ-მინისტრს, ირაკლი კობახიძეს, ტელეფონით ესაუბრა. მათ განიხილეს ერთობლივი სამუშაო ჯგუფის სტატუსი, რომელიც მიზნად ისახავს ე.წ. უცხოური გავლენის კანონში ცვლილებების შეტანას. როგორც ცნობილია, 2024 წლის 20 დეკემბერს, თბილისში ვიზიტისას, ევროპის საბჭოს გენერალური მდივანი და საქართველოს მთავრობა აღნიშნული ერთობლივი სამუშაო ჯგუფის შექმნაზე შეთანხმდნენ. 20 იანვარს, ევროსაბჭოს სამდივნომ საქართველოს მთავრობას ოფიციალური წერილი გაუგზავნა, თუმცა თხოვნა უპასუხოდ დარჩა,“ - აღნიშნულია განცხადებაში.

,,3 თებერვალს, სატელეფონო საუბრისას საქართველოს პრემიერ-მინისტრმა ირაკლი კობახიძემ განაცხადა, რომ „შეცვლილი გარემოებების გამო“ მის მთავრობას აღარ სურს მონაწილეობა მიიღოს ერთობლივ სამუშაო ჯგუფში ან შეცვალოს „უცხოური გავლენის“ კანონში, როგორც ეს ადრე იყო განხილული. თუმცა, მან კიდევ ერთხელ დაადასტურა საქართველოს ვალდებულება გააგრძელოს მუშაობა ევროპის საბჭოსთან მთავრობათაშორისი თანამშრომლობის ფარგლებში.

გენერალურმა მდივანმა დიდი სინანულით აღნიშნა საქართველოს ხელისუფლების გადაწყვეტილება. მან ასევე გაიმეორა შეშფოთება საქართველოში კანონის უზენაესობისა და ადამიანის უფლებების მდგომარეობის, ასევე მისი პოლიტიკური ლანდშაფტის პოლარიზაციის შესახებ. ახლა ამოცანაა შევაფასოთ მთავრობის კურსის შეცვლის შედეგად შექმნილი ახალი ვითარების გავლენა. საქართველოს ხელისუფლებასთან დიალოგი გრძელდება.

ევროპის საბჭოს როლი არის ენერგიულად დაიცვას დემოკრატიის, კანონის უზენაესობისა და ადამიანის უფლებების პრინციპები. ამ მიზნით, გენერალური მდივნის ვიზიტის შემდეგ, ევროპის საბჭოს რამდენიმე ორგანო ეწვია საქართველოs მათ შორის ევროპის საბჭოს საპარლამენტო ასამბლეის თანამომხსენებლები, წამების პრევენციის კომიტეტი (CPT), ადამიანის უფლებათა კომისარი და ადგილობრივი და რეგიონული ხელისუფლების კონგრესი”, – ნათქვამია განცხადებაში.

ცნობისთვის, საქართველოს მთავრობის ადმინისტრაციას ამასთან დაკავშირებით განცხადება ჯერ არ გაუკეთებია.