ინდოეთის წამლების რეგულატორმა ოთხ წლამდე ასაკის ბავშვებში გაციების საწინააღმდეგო კომბინირებული წამლების გამოყენება აკრძალა. ესენია - ქლორფენირამინის მალეატი და ფენილეფრინი, რომლებიც 2015 წელს დამტკიცდა. ეს პრეპარატები ხველების საწინააღმდეგო სიროფებისა და ტაბლეტების სახით გაციების სიმპტომების სამკურნალოდ  გამოიყენება. 

ბრძანების მიხედვით, რომელიც 20 დეკემბერს გამოქვეყნდა, კომბინირებული წამლების მწარმოებლებმა თავიანთ პროდუქტებზე უნდა დაურთონ ეტიკეტი გაფრთხილებით, რომ ისინი არ უნდა იყოს გამოყენებული ოთხ წლამდე ასაკის ბავშვებისთვის. ქვეყანამ ასევე მედიკამენტების შემოწმება გააძლიერა - ივნისში, მთავრობამ კომპანიები დაავალდებულა, რომ მსოფლიოს სხვა ნაწილებში ექსპორტზე გატანამდე, ხველების საწინააღმდეგო სიროფები შეემოწმებინა.

ინდური წარმოების ხველების საწინააღმდეგო სიროფების შესწავლა გასულ წელს დაიწყო. ჯანმომ გლობალური გაფრთხილება გამოაქვეყნა ინდური წარმოების ხველების საწინააღმდეგო სიროფების შესახებ, რომლებიც, სავარაუდოდ, დაკავშირებულია გამბიაში 66 ბავშვის სიკვდილთან. მსგავსი ფატალური შემთხვევა დაფიქსირდა უზბეკეთშიც, სადაც, ქვეყნის ჯანდაცვის სამინისტროს ცნობით, 2022 წლამდე 18 ბავშვი გარდაიცვალა, სავარაუდოდ, ინდური წარმოების სიროფის მოხმარების გამო.

სიროფიდან აღებული ნიმუშების ლაბორატორიულმა ანალიზმა დაადასტურა, რომ სიროფი „დაუშვებელი რაოდენობით“ მოიცავს დიეთილენ გლიკოლსა და ტოქსიკურ ალკოჰოლს, სახელწოდებით ეთილენგლიკოლი. 

როგორც ცნობილია, გასული წლიდან გამბიასა და უზბეკეთში ბავშვთა სიკვდილიანობის ტალღა ინდური წარმოების ხველების საწინააღმდეგო სიროფებთან იყო დაკავშირებული. 2019 წელს, ინდოეთში, მსგავსი წამლის მიღების გამო, 12 ბავშვი გარდაიცვალა. თუმცა, აღნიშნული წამლების მწარმოებლები რაიმე სახის დარღვევას უარყოფენ.