უნგრეთის პრემიერ-მინისტრმა, ვიქტორ ორბანმა განაცხადა, რომ არ უჭერს მხარს ვოლოდიმირ ზელენსკის „გამარჯვების გეგმას“, რადგან ის არ არის მომგებიანი უნგრეთისთვის.

ორბანმა უნგრეთის „სახელმწიფო რადიოსთან“ ინტერვიუში განაცხადა, რომ „შოკირებული“ იყო, როდესაც მოუსმინა ვოლოდიმირ ზელენსკის „გამარჯვების გეგმის“ პრეზენტაციას, რის შემდეგაც გაჩნდა კითხვა, თუ რა იყო მათი გეგმა აქამდე.

„თუ ისინი ახლა გადადიან გამარჯვების გეგმაზე, მაშინ აქამდე დამარცხების გეგმა ჰქონდათ?“, – განაცხადა ორბანმა.

უნგრეთის პრემიერ-მინისტრმა აღნიშნა, რომ ბუდაპეშტი არ უჭერს მხარს ამ გეგმას, რადგან „ეს არ არის გამარჯვების გეგმა უნგრეთისთვის“.

„ომში აქამდე მონაწილეობას არ ვიღებდით და არც ახლა მივიღებთ. ამ გეგმით ვერ გაიმარჯვებთ“, – განაცხადა ვიქტორ ორბანმა.

მისი თქმით, კონფლიქტი ფრონტზე ვერ გადაწყდება.

„ჩვენ უნდა დავსხდეთ მოლაპარაკების მაგიდასთან“, – აღნიშნა უნგრეთის პრემიერ-მინისტრმა.