იტალიის სერია A-ს 29-ე ტურის შეხვედრა „ნაპოლიმ“ „ლეჩესთან“ სტუმრად ჩაატარა და 2:1 მოიგო.

ხვიჩა კვარაცხელია ძირითად შემადგენლობაში იყო. „ნაპოლიმ“ კი თამაში კარგად დაიწყო და მე-18 წუთზე ჯოვანი დი ლორენცოს ზუსტი თავური დარტყმით დაწინაურდა.

ტაიმის ბოლოს კვარაცხელიას გადაცემის შემდეგ ირვინგ ლოსანო ხელსაყრელ პოზიციაზე დარჩა, მაგრამ ამ შანსით ვერ ისარგებლა.

შესვენების შემდეგ „ნაპოლი“ დამშვიდებული ჩანდა და გოლიც გაუშვა – 52-ე წუთზე „ლეჩეს“ შეტევა ფედერიკო დი ფრანჩესკომ ზუსტი დარტყმით დააგვირგვინა და მასპინძლებს თამაშის მოგების იმედი დაუბრუნა.

„ნაპოლიმ“ მაინც მოახერხა დაწინაურება, ეს 65-ე წუთზე მოხდა. კვარაცხელიამ შეტევა მარიო რუის გაუგრძელა, რომლის ჩაწოდების შემდეგ ბურთი საკუთარ კარში „ლეჩეს“ მცველმა ანტონინო გალომჩაჭრა.

„ნაპოლის“ მწვრთნელი ლუჩანო სპალეტი აშკარად „მილანთან“ ჩემპიონთა ლიგის მატჩზე (12 აპრილი) ფიქრობდა და ექსპერიმენტებს მიმართა. მაგალითად, ხვიჩა კვარაცხელიამ ამ შეხვედრაში პოზიცია რამდენჯერმე შეიცვალა, მოედნის ცენტრშიც ვიხილეთ, მარცხენა და მარჯვენა ფლანგზეც. 83-ე წუთზე, როდესაც ჯოვანი სიმეონე დაშავდა, ქართველი ლეგიონერი ცენტრალურ თავდამსხმელის პოზიციაზეც გადავიდა. არბიტრის მიერ დამატებულ წუთებზე სპალეტიმ ხვიჩა შეცვალა.

საბოლოოდ, „ნაპოლიმ“ მოახერხა შეხვედრის გამარჯვებამდე მიყვანა და ჩემპიონთა ლიგაზე „მილანთან“ მატჩის წინ კარგი განწყობა შეიქმნა.

ამ მატჩის შემდეგ „ნაპოლიმ“ 74 ქულა დააგროვა, „ლაციოსთან“ (55) უპირატესობა გაზარდა („ლაციო“ ტურის შეხვედრას 8 აპრილს ჩაატარებს) და სეზონის დასრულებამდე ცხრა ტურით ადრე იტალიის ჩემპიონობას კიდევ უფრო მიუახლოვდა.