თეირანი უპასუხებს იმ ქვეყნებს, რომლებიც დაუშვებენ თავიანთი ტერიტორიების გამოყენებას ისლამური რესპუბლიკის წინააღმდეგ პოტენციური თავდასხმებისთვის, – ამის შესახებ ირანის პარლამენტის სპიკერმა, მოჰამად ბაღერ ყალიბაფმა განაცხადა.

ირანის საკანონმდებლო ორგანოს სპიკერის თქმით, მეზობელი ქვეყნების საჰაერო სივრცე და ხმელეთი არ უნდა იქნას გამოყენებული ირანის წინააღმდეგ თავდასხმისთვის, წინააღმდეგ შემთხვევაში, პასუხი იქნება ნათელი და ბუნებრივი. მოჰამად ბაღერ ყალიბაფის განმარტებით, ირანი შურს იძიებს ნებისმიერ ადგილზე, საიდანაც განხორციელდება თავდასხმა ირანის წინააღმდეგ.

„ირანი დარწმუნებულია, რომ მისი მეზობლები დასავლეთ აზიის რეგიონში განიხილავენ ამ საკითხს ისევე, როგორც ისინი უარს ამბობდნენ წარსულში თავიანთი ტერიტორიების ისლამური რესპუბლიკის წინააღმდეგ გამოყენებაზე. ჩვენ გვაქვს მშვიდობიანი ურთიერთობები რეგიონის ყველა ქვეყანასთან. ჩვენ არაერთხელ ვთქვით, რომ არ გვინდა ომის გაფართოება, მაგრამ აუცილებლად ძლიერად და სათანადოდ ვუპასუხებთ ნებისმიერ თავდასხმას ჩვენი ქვეყნის წინააღმდეგ“, – განაცხადა მოჰამად ბაღერ ყალიბაფმა.