გუშინ გავრცელებული ინფორმაციის თანახმად, საქართველოს ნაკრებისა და "ბორდოს" 23 წლის ნახევარმცველის, ზურიკო დავითაშვილის შეძენის სურვილი ლიგა 1-ში გადასულ "სენტ-ეტიენს" აქვს, ახლა კი TUTTO mercato WEB-ი იტყობინება, რომ მისი სამსახურით სერია A-ს სამი კლუბი დაინტერესდა.

გამოცემა წერს, რომ სერია A-ში შეიძლება "ახალი კვარა" ჩავიდეს, რომელმაც ევროპის ჩემპიონატზე ოთხივე მატჩში მიიღო მონაწილეობა. ქართველის მიმართ ყველაზე დიდ ინტერესს "კომო" და "ვენეცია" იჩენენ, აგრეთვე - "ჯენოა". რამდენიმე დღეში ფეხბურთელის წარმომადგენლები იტალიაში ჩავლენ და შეიძლება ტრანსფერი მალე განხორციელდეს.

დავითაშვილს ჟირონდულ კლუბთან კონტრაქტი 2027 წლის ზაფხულამდე
აქვს გაფორმებული.