საქართველოს სახალხო დამცველი ლევან იოსელიანი გარდაბნის მუნიციპალიტეტის სოფლებს ნაზარლოსა და ქესალოს ეწვია და ელექტრონული ტექნოლოგიების გამოყენებით ხმის მიცემის ახლად დანერგილ პროცესს ადგილზე გაეცნო.

ინფორმაციას სახალხო დამცველის აპარატი ავრცელებს.

მათივე ცნობით, სახალხო დამცველი ასევე შეხვდა და ესაუბრა ამომრჩევლებს, საარჩევნო ადმინისტრაციის წარმომადგენლებსა და დამოუკიდებელ დამკვირვებლებს.

„ადგილზე დაკვირვებისა და მიღებული ინფორმაციის თანახმად, სოფლებში არჩევნები ამ ეტაპზე გაუთვალისწინებელი დაბრკოლებების გარეშე მიმდინარეობს.

სახალხო დამცველი იმედს გამოთქვამს, რომ საპარლამენტო არჩევნები ცივილურად, ექსცესებისა და ფიზიკური დაპირისპირების გარეშე ჩაივლის.

ამასთან, სახალხო დამცველი კიდევ ერთხელ მოუწოდებს მოქალაქეებს, რომ თუ მათ მიმართ დაირღვევა საარჩევნო უფლება, ან მათთვის ცნობილი გახდება ამგვარი უფლების შეზღუდვის შესახებ, აუცილებლად მიმართონ სახალხო დამცველის აპარატს ცხელ ხაზზე - 1481,“ - აღნიშნულია ინფორმაციაში.