„2019 წლის 25 ნოემბრით დათარიღებული საკონსულო პატენტის საფუძველზე, გიორგი სალაყაია საქართველოს ხელისუფლების მიერ აღიარებულია, როგორც ქალაქ თბილისში სან-მარინოს რესპუბლიკის საპატიო კონსული. საკონსულო ოლქი, რომლის ფარგლებშიც ბატონი გიორგი სალაყაია შეასრულებს თავის ფუნქციებს, მოიცავს საქართველოს მთელ ტერიტორიას“, – აღნიშნულია განცხადებაში.

2012 წლის პირველ ოქტომბრამდე სან-მარინოს საპატიო კონსული ბიძინა ივანიშვილი გახლდათ, რომელიც 2014 წელს მსოფლიოში აღიარებულმა იტალიელმა მეღვინემ დოქტორმა დონატო ლანატიმ შეცვალა.

სან მარინოსა და საქართველოს შორის მრავალი წელია, ორმხრივი თანამშრომლობაა. 2013 წელს, სან- მარინოში გაიმართა ორმხრივი პოლიტიკური კონსულტაციები მინისტრის მოადგილეების დონეზე. 2015 წლის 18-20 ნოემბერს, საქართველოს ვიზიტით ეწვია სან- მარინოს საგარეო და პოლიტიკურ საქმეთა მინისტრი პასკუალე ვალენტინი. ვიზიტის ფარგლებში ხელი მოეწერა ურთიერთგაგების მემორანდუმს ორი ქვეყნის საგარეო საქმეთა სამინისტროებს შორის თანამშრომლობის შესახებ. საქართველოსა და სან- მარინოს შორის დადებულია 3 შეთანხმება და ქვეყნებს შორის თანამშრომლობა დინამიურად ხორციელდება საერთაშორისო ორგანიზაციების ფარგლებში.

როგორც გიორგი სალაყაიამ განაცხადა, მისთვის სან-მარინოს საპატიო კონსულად დანიშვნა დიდი პასუხიმგებლობაა. მისი თქმით, ის ძალიხმევას არ დაიშურებს, რათა საქართველოსა და სან-მარინოს შორის, ეკონომიკური და კულტურული თანამშრომლობა კიდევ უფრო განვითარდეს და გაღრმავდეს.

სან-მარინოს რესპუბლიკა სამხრეთ ევროპაში, აპენინის ნახევარკუნძულზე მდებარეობს და ტერიტორია, ამავე სახელწოდების დედაქალაქის ჩათვლით, 9 უძველესი ქალაქი-კომუნისგან შედგება.