ცხინვალმა განაცხადა, რომ რუსეთის ფედერაციის მიერ ნავთობპროდუქტების ექსპორტზე დაწესებული შეზღუდვები სამხრეთ ოსეთს არ შეეხება. ამაში მოსახლეობას თვითგამოცხადებული რესპუბლიკის ე.წ. ეკონომიკის სამინისტროს ხელმძღვანელი ძამბოლატ ტადტაევი არწმუნებს.

ცხინვალის წარმომადგენელი, ისევე როგორც სოხუმის წარმომადგენლები, მიუთითებს რუსეთის მთავრობის დადგენილების „გ“ პუნქტში „რუსეთის ფედერაციიდან კომერციული ბენზინისა და დიზელის საწვავის ექსპორტის დროებითი აკრძალვის შესახებ“ - წერს SOVA.

ამ პუნქტში ნათქვამია, რომ ნავთობპროდუქტების ექსპორტის აკრძალვა არ გავრცელდება იმ შემთხვევებზე, როდესაც ძალაშია „სახელმწიფოთაშორისი ხელშეკრულებები“.

ტადტაევი მიიჩნევს, რომ 23 სექტემბერს ამ რეზოლუციაში შევიდა ცვლილებები, რომლებიც ყველამ არასწორად განმარტა. მისი ვერსიით, „გ“ ქვეპუნქტი სხვა ფორმულირებით იყო დაფიქსირებული, ხოლო „კ“ ქვეპუნქტი სრულიად გამორიცხული იყო და მედიამ ეს ისე აღიქვა, თითქოს შეზღუდვები შეეხო ცხინვალსა და სოხუმს.

ე.წ. სამხრეთ ოსეთის „ეკონომიკის სამინისტროს ხელმძღვანელმა“ განმარტა, რომ 2012 წელს მოსკოვსა და ცხინვალს შორის დაიდო „შეთანხმება“ საქონლით ვაჭრობის რეჟიმზე, რომლის მიხედვითაც ცხინვალი და მოსკოვი ყოველწლიურად ხელს აწერენ ოქმებს, რომლითაც რუსული ნავთობპროდუქტები შიდა მოხმარებისთვის ექსპორტზე გადის.  სამხრეთ ოსეთი გათავისუფლებულია საექსპორტო საბაჟო გადასახადისგან.

რუსეთმა 21 სექტემბერს გამოაქვეყნა დოკუმენტი „რუსეთის ფედერაციიდან კომერციული ბენზინისა და დიზელის საწვავის ექსპორტის დროებითი აკრძალვის შესახებ“, სადაც ნათქვამია, რომ საწვავის მიწოდება გამონაკლისის სახით მოხდება სოხუმისა და ცხინვალის შემთხვევაში.

დოკუმენტში ნათქვამია, რომ დროებითი აკრძალვა არ ვრცელდება: „კ) რუსეთის ფედერაციის ტერიტორიიდან აფხაზეთისა და სამხრეთ ოსეთის რესპუბლიკაში ექსპორტირებულ საქონელზე.

მაგრამ შემდეგ მოსკოვმა გადაიფიქრა და გაურკვეველი მიზეზის გამო, 23 სექტემბერს, რუსეთის მთავრობამ განაახლა გამონაკლისების სია, რომლებიც დაკავშირებულია ქვეყნიდან ბენზინისა და დიზელის საწვავის ექსპორტის „დროებით“ აკრძალვასთან. შედეგად, დოკუმენტის „კ“ პუნქტი „ბათილი იყო“, სადაც ნათქვამია, რომ გადაწყვეტილება არ შეეხება საქართველოს ოკუპირებულ ტერიტორიებს.