ფონდის, „თავისუფალი რუსეთის“ დირექტორმა სამხრეთ კავკასიაში, ეგორ კუროპტევმა განაცხადა, რომ რუსეთიდან ჩამოსული პოლიტიკური აქტივისტების საქართველოში ხელახლა შესვლაზე უარის თქმის შემთხვევები იზრდება. კუროპტევი მიუთითებს საქართველოს ხელისუფლების მხრიდან საზოგადოებაზე შესაძლო პოლიტიკურ ზეწოლაზე.

„სამხრეთ კავკასიაში ფონდ „თავისუფალი რუსეთის“ სახელით მინდა გამოვთქვა სერიოზული შეშფოთება რუსეთის უკრაინაში შეჭრის დაწყებიდან საქართველოში მცხოვრები რუსი პოლიტიკური აქტივისტებისა და უფლებადამცველებისთვის საქართველოში ხელახლა შესვლაზე განმეორებით უარის გამო. კერძოდ, მხოლოდ გასულ კვირას ორ ადამიანს ეთქვა უარი ერთდროულად. ორივე შემთხვევაში, უკანა რეისის მოლოდინისას, საქართველოს აეროპორტებში პოლიციამ აქტივისტებს კომუნიკაციის საშუალებები ჩამოართვა“, - აღნიშნა მან.

ფონდის „თავისუფალი რუსეთის“ ცნობით, ერთ შემთხვევაში, აქტივისტი ჩამოვიდა რუსეთიდან და დააბრუნეს, რამაც შეიძლება „პირდაპირი საფრთხე შეუქმნას იმ რუსებს, რომლებიც იძულებულნი არიან დატოვონ რუსეთის ტერიტორია პოლიტიკური დევნის გამო“.

„ორივე აქტივისტი, რომლებსაც გასულ კვირას უარი ეთქვათ, პირდაპირ კავშირში იყვნენ საპრეზიდენტო კანდიდატისთვის ხელმოწერების შეგროვების კამპანიასთან, რომელსაც მხარი დაუჭირა მთელმა რუსულმა ოპოზიციამ მიმდინარე წლის იანვარში“, - თქვა კუროპტევმა.