ეკონომისტის, ოთარ ნადარაიას განმარტებით, ლარის კურსზე სენტიმენტების ცვლილება გავლენას ახდენს. როგორც გადაცემა “საქმიანი დილის” ეთერში, ნადარაიამ განაცხადა, ლარის დეპოზიტების ზრდის ტემპი მკვეთრად არის შემცირებული.

“ეროვნული ბანკის ვებგვერდზე არის ფულადი აგრეგატების დინამიკა, რაც საჯაროა და რისი ნახვაც ყველას შეუძლია. როცა სენტიმენტებში არის ცვლილება, როცა გაუფასურების მოლოდინებია, მაშინ ლარის დეპოზიტების ვალუტის დეპოზიტებისკენ გადადინება ხდება.

ლარის დეპოზიტები უფრო მზარდი იყო, ვიდრე დოლარის. თუმცა, მაისში უკვე აშკარაა, რომ პირველ რიგში, ჯამური დეპოზიტების ზრდის ტემპი მაღალია, სამივე ვალუტას თუ ავიღებთ - ლარი, დოლარი, ევრო. ამასთან, რეკორდულად მაღალია ვალუტის დეპოზიტების ზრდის ტემპი. ლარის დეპოზიტების ზრდის ტემპი კი მკვეთრად დაეცა, თვე თვეზე უარყოფითშიც კი გადავიდა. რა შეიცვალა? ის რომ თანხობრივად რომ ვთქვათ, ჩვენი შეფასებით, დაახლოებით 200-300 მლნ დოლარის ე.წ. გადახურდავებები მოხდა”, - აღნიშნა ოთარ ნადარაიამ.

მან საქართველოს ეკონომიკის “სეზონურობაზეც” გაამახვილა ყურადღება და აღნიშნა, რომ ადრე სეზონურობა ლარსაც ახასიათებდა.

“საქართველოს ეკონომიკას სავალუტო შემოდინებების კუთხით აქვს მკვეთრად გამოხატული სეზონურობა, ზაფხული უკეთესია ვიდრე ზამთარი, მათ შორის ტურისტული შემოდინებებისა და ენერგომატარებლების გამო. ჩვენ გვახსოვს, რომ ლარსაც ჰქონდა სეზონურობა, 2017-19 წლებში, ლარიც ზაფხულში მყარდებოდა, შემდეგ ზამთარში უფასურდებოდა. ამის შემდეგ ჩვენმა დიდმა ნაწილმა ისწავლა, რომ ლარი სეზონურია, და ზაფხულამდე დაიწყო ლარის ყიდვა და ზამთრამდე ლარის გაყიდვა. ამ ქცევამ ის გავლენა იქონია, რომ ბოლო წლებში ლარის სეზონურობას ვეღარ ვხედავთ, ვინაიდან ჩვენ ვიცით, რომ ლარს სეზონური მერყეობა ექნება, ვინც ცდილობს რომ ლარის კურსით მოიგოს, ის ზაფხულის სეზონის მოსვლამდე ყიდულობს ლარს და პირიქით. ეს რატომაა მნიშვნელოვანი? ამ ზაფხულამდე პერიოდი ისეთი იყო, რომ ყველა ლარს ყიდულობდა, სენტიმენტები რომ შეიცვალა, ფაქტობრივად, რაც უნდა გადახურდავებულიყო ივლის-აგვისტოში, იმის დიდი ნაწილი უკვე გადახურდავდა”, - განაცხადა მან და დასძინა, რომ მოლოდინებზე გავლენას ახდენდა არჩევნებიც: “ბოლო 5-10 წლის განმავლობაში, იყო მოლოდინი, რომ ლარი არჩევნების მერე გაუფასურდებოდა. ამიტომაც თუ ეს მოლოდინებია, არჩევნებამდე მოხდება უფრო მეტად ვალუტის დეპოზიტების და ლარის სესხების ფორმირება”, - განმარტა ოთარ ნადარაიამ “საქმიან დილაში”.