პარლამენტის ადამიანის უფლებათა კომიტეტის თავმჯდომარემ რატი იონათამიშვილმა გაავრცელა ინფორმაცია ფრაქცია „ქართულმა ოცნების“ მიერ მომზადებული „ამნისტიის პროექტის“ შესახებ.

ტექსტის თანახმად, ამნისტია შეეხება 2024 წლის 1 ივლისამდე ჩადენილ დანაშაულებს, კერძოდ, სისხლის სამართლის კოდექსის 66 მუხლით გათვალისწინებულ დანაშაულებში მსჯავრდებულები სასჯელისგან სრულად გათავისუფლდებიან ან შეუმცირდებათ 1/2-ით, ან 1/4-ით. სასჯელის 1/6-ით შემცირება კი შეეხება სსკ-ის 225 მუხლს.

ჯამში სასჯელისგან სრულად ან ნაწილობრივ გათავისუფლება სისხლის სამართლის კოდექსის 291 მუხლით გათვალისწინებულ დანაშაულებს შეეხება.

პროექტი ადგენს ამნისტიის შემდეგ ფორმებს:

• პასუხისმგებლობისა და სასჯელისგან სრულად გათავისუფლება;
• სასჯელის ½-ით შემცირება;
• სასჯელის 1/4-ით შემცირება;
• სასჯელის 1/6-ით შემცირება;
• და პრობაციონერებისთვის პირობითი მსჯავრის ერთი წლით შემცირება.

„ამნისტიის პროექტით სიახლის სახით გათვალისწინებული 1/6-ით შემცირების წესი, რაც მაქსიმალურად აფართოებს ამნისტიის ბენეფიციართა წესს“, - აღნიშნავენ კანონპროექტის ავტორები.

კონკრეტული მუხლების ჩამონათვალი, რომლებზეც ამნისტია გავრცელდება, მოგვიანებით გახდება ცნობილი.

ვის შეეხება ამნისტია და ვის არა?

ამნისტია არ შეეხება:

• მკვლელობისთვის ნასამართლებ პირებს;
• ნარკორეალიზატორებს;
• სქესობრივ დანაშაულებს;
• ყაჩაღობას;
• ტერორიზმს;
• კორუფციულ და სამოხელეო დანაშაულს;
• ქურდულ სამყაროს;
• კონვენციურ დანაშაულებს;
• ტრეფიკინგს და სხვა მძიმე და განსაკუთრებით მძიმე კატეგორიის დანაშაულებს.

„ქართული ოცნების“ ცნობით, პირობითი მსჯავრის ერთი წლით შემცირება შეეხება დაახლოებით, 7 000 პირს.

კანონის პირველი მოსმენით მიღება იგეგმება რიგგარეშე სესიაზე. კანონპროექტზე მუშაობა გაგრძელდება საშემოდგომო სესიის ფარგლებში.

„თუ იქნება გამოთქმული არგუმენტირებული შენიშვნები, მზად ვართ მცირე სახის ცვლილებები საკომიტეტო მოსმენის დროს გავიზიაროთ“, - აცხადებს ქართული ოცნება“.

პროექტის ავტორები განსაკუთრებულ მადლობას უხდიან შსს-ს, პროკურატურას, იუსტიციის სამინისტროს და სხვა სახელმწიფო უწყებებს, რომელთა მონაწილეობით მომზადდა ამნისტიის პროექტი.