არის ლაპარაკი იმაზე, რომ ჩვენ დასავლეთისკენ აღარ მივდივართ, მაგრამ სინამდვილეში ჩვენ კი აღარ მივდივართ, დასავლეთი ვეღარ ფართოვდება აღმოსავლეთით იმის გამო, რომ რუსეთის ფაქტორი გაიზარდა, – განაცხადა საზოგადოებრივი ორგანიზაციის, „პოლიტიკური არჩევანის“ დამფუძნებელმა, რომან კაკულიამ საქართველოს პირველი არხის გადაცემაში „აქტუალური თემა – მაკა ცინცაძესთან ერთად“.

„ეს არასამთავრობოები რატომ გახდა პრობლემა? იმიტომ, რომ რეალობა შეიცვალა, რომელსაც ისინი არ აღიარებენ. ჩვენც მოგვწონდა ეს და ჩვენც გვინდოდა, გავმხდარიყავით იმ რაღაც ცხოვრების სტილის ნაწილი, რადგან გვეგონა, იქ ყველაფერი მარტო საუკეთესოა, მაგრამ აქ მოხდა სულ სხვა რამ. რუსეთმა დააფიქსირა თავისი პოზიცია, რომ ის აღარ მიიღებს ამ გაფართოებას ისე, როგორც იღებდა 1999-ში და 2004-ში; დააფიქსირა, აღმართა ეს კედელი. ჩვენ და უკრაინა ვიყავით, სადაც უნდა გასულიყო ეს გაფართოება, მაგრამ მენტალური ომი აქ დიდი ხნის წინ იყო დაწყებული, ხალხი უკვე იმას ეკუთვნოდა და ახლა, როდესაც ეს კედელი აღიმართა, ჩვენ უკვე დავინახეთ, როცა შევეხეთ; მივხვდით, რომ ეს რაღაც სხვა რეალობაა და, მგონი, იქ ვეღარ მივდივართ, მაგრამ ჩვენი მოსახლეობის 50% იქ არის უკვე. ჩვენ ვერ მივდივართ იქ, რადგან რუსეთის ფაქტორი გახდა ასეთი. უბრალოდ, რუსეთმა შეძლო ის, რაც ვერ შეძლო, მაგალითად, 1999 წელს, როდესაც ნატო-ს წევრებით პირველი გაფართოება მოხდა. მერე ისევ ვერ შეძლო 2004 წელს, როდესაც პოლონეთი, რუმინეთი, ბალტიისპირეთის ქვეყნები და სხვები შეუერთდნენ ნატო-ს. მაგრამ შემდეგ, 2008 წელს პირველი გამოხმაურება ჩვენ ვიყავით, 2014 წელს – უკრაინა და მერე უკვე თქვა: მე უკვე შემიძლია, ეს გავაჩერო. ახლა მართალია, არ არის მართალი, ეს უკვე სხვა საკითხია. უბრალოდ, თქვა, მორჩა, ვეღარ წამოხვალთ ამის იქითო. ჩვენ დავინახეთ ეს სხვა რეალობა, ამ დროს კი აქ გვყავს ეს არასამთავრობო სექტორი, რომელსაც ამის დანახვა არ უნდა. Ამბობს, ვითომ არაფერი არ შეცვლილა, არადა, ეს შეიცვალა. შენ გჭირდება, აქედან გამომდინარე, სხვანაირად იმოქმედო“, – განაცხადა კაკულიამ.

მისი თქმით, უბედურება ის არის, რომ მთელი ოპოზიცია გეოპოლიტიკურ ილუზიაში აცხოვრებს საზოგადოებას.

„ფუტურიზმის საწინააღმდეგო არაფერი მაქვს, ხელოვნებაში და ლიტერატურაში იდეალური რაღაცები შეუქმნია, მაგრამ პოლიტიკაში ფუტურიზმი როგორ შეიძლება? არადა, ფუტურიზმია ეს, როდესაც შენ ქმნი იდეალურ მოცემულობას და არც კი გაინტერესებს, მისასვლელი გზები როგორია ან რა წინააღმდეგობები შეიძლება არსებობდეს. თავის თავს იდეალისტებს უწოდებენ, მაგრამ სინამდვილეში ფუტურისტები არიან“, – განაცხადა კაკულიამ.

როგორც მან აღნიშნა, ადამიანს აქვს საკუთარი თავის რეალიზაციის მოთხოვნილება და მენტალურ ომებში ყველაზე მაგარ იდეად აღიარებულია მტრის ხატის გამოცხადების იდეა.

„რატომ ჰქვია იდეოლოგიას კოჭლი რელიგია, ხომ? მენტალური ომები აგებულია სწორედ იმაზე, რომ ადამიანს, რომელსაც საკუთარი თავის რეალიზაციის, თავისი სამყაროს სურათის და მასში თავისი ადგილის დანახვის მოთხოვნილება აქვს, ფეიკი თუ შემოგიგდეს, შემოდის შენთვის ისეთი მოსაზრება, რომელმაც შეიძლება, თავი რეალიზებულად გაგრძნობინოს, მაგრამ ყველაზე მაგარ იდეად აღიარებულია მტრის ხატის გამოცხადების იდეა. ადამიანი ყველაზე რეალიზებულად მაშინ გრძნობს თავს, როდესაც ებრძვის მტერს და როდესაც ფიქრობს, ამას თუ დავამარცხებ, მორჩა, ჩემი ცხოვრება შემდგარია, მე ვიპოვე ჩემი მიზანი და ამას მივაღწევ“, – განაცხადა კაკულიამ.

გადაცემის წამყვანის შეკითხვაზე, როგორ უნდა დააღწიოს თავი საზოგადოებამ ამ რეალობას, რომან კაკულიამ განაცხადა, რომ გამოსავალი სამი არსებობს.

„ან ტერიტორია უნდა გავყოთ და ეს გამორიცხულია საქართველოს შემთხვევაში, ან ერთმანეთთან უნდა მოვძებნოთ დალაპარაკების საშუალება, ან ერთმა უნდა გააჩუმოს მეორე. სხვა გამოსავალი არ არის. ან ერთმა მეორე უნდა გააჩუმოს საბოლოოდ, ან უნდა მოვახერხოთ იმის გაგება, რომ ჩვენი პოზიცია, შეიძლება, ერთადერთი ჭეშმარიტება არ იყოს. ეს არის ჩვენი კულტურის ნაწილი. სამწუხაროდ, რატომ ჩამოყალიბდა, არ ვიცი და მერე ამას ხელი იმან შეუწყო, რომ ადამიანები სხვა ცივილიზაციაში გადავიდნენ. მსოფლმხედველობრივი დაპირისპირება სულ სხვა ბუნების დაპირისპირებაა, ჩვენ ხომ გვესმის? აქ, ვიდრე შენ არ დაფიქრდები იმ წყაროზე, რამაც შენი მსოფლმხედველობა ჩამოაყალიბა და არ მიხვდები, რომ ეს, შეიძლება, ერთადერთი ჭეშმარიტება არ იყოს, შენთვის დაკეტილია ეს სივრცე. ამ მენტალურმა ომმა ეს გზა დაკეტა“, – განაცხადა რომან კაკულიამ.