დილით ადრე, რიგგარეშე სხდომაზე ოკუპირებული აფხაზეთის ე.წ. პარლამენტმა რატიფიცირება მოახდინა რუსეთ-აფხაზური შეთანხმებისა, რომლითაც დაამტკიცა ბიჭვინთის სახელმწიფო აგარაკის რუსეთისთვის გადაცემა.

ამის შესახებ დოკუმენტის ოპონენტებს, რომლებიც გუშინ საღამოდან „პარლამენტის“ შენობის წინ იმყოფებოდნენ, „საკანონმდებლო ორგანოს“ დეფაქტო სპიკერმა ლაშა აშუბამ განუცხადა. შეხვედრაზე დასწრების უფლება მხოლოდ აფხაზეთის ტელევიზიის ჟურნალისტებს მიეცათ.

„ყველას აწუხებდა ეს ვითარება და პარლამენტის დეპუტატებსაც და პარლამენტში მისულ ადამიანებსაც ბევრი წუხილი ჰქონდათ. დღეს ჩვენ მივიღეთ არაერთი დელეგაცია და განვიხილეთ ამ შეთანხმების მიღების რამდენიმე ვარიანტი რესპუბლიკის უსაფრთხოების მიზნით. პირველი ვარიანტი, რომელიც კოორდინატებთან იყო დაკავშირებული, რუსულმა მხარემ მიიღო და მივიღეთ. კითხვა დარჩა „მესამე მხარეებთან“ დაკავშირებით. შედგა შესაბამისი შეხვედრა ხელისუფლებისა და ოპოზიციის წარმომადგენლებს შორის, რომელზეც მივედით კონსენსუსის დოკუმენტამდე. ეს არის ცვლილება შესაბამის კანონში. ეს არის კანონი საერთაშორისო ხელშეკრულებების შესახებ, სამოქალაქო კოდექსი და სპეციალური კონსტიტუციური კანონი, რომელიც კონკრეტულად ეხება სახელმწიფო დაჩის გადაცემას, სადაც ნათქვამია, რომ თუ ობიექტი გადაეცა მესამე პირებს, ხელშეკრულება წყდება და ქონება უბრუნდება აფხაზეთის რესპუბლიკას. ეს გადაწყვეტილება განიხილეს ხელისუფლებისა და ოპოზიციის წარმომადგენლებმა“ - განაცხადა აშუბამ.

მისი თქმით, შემდგომში ეს გადაწყვეტილებები „პარლამენტს გადაეგზავნა“ და დაიწყო განხილვა.

„ჩვენ ყველა დოკუმენტი მივიღეთ პირველ, მეორე და მესამე დასკვნით მოსმენით“, - დასძინა მან.

ოპოზიციონერებმა და საზოგადო მოღვაწეებმა პარლამენტის გადაწყვეტილებას "სამარცხვინო" უწოდეს და მისი გაუქმება მოითხოვეს. ყოფილი ომბუდსმენის ასიდა შაკრილის განცხადებით, მიღებული გადაწყვეტილება არალეგიტიმურია.

„ყველაზე უარესი, რასაც ჩვენ ველოდით, მოხდა. დეპუტატებმა იგნორირება გაუკეთეს აფხაზეთის რესპუბლიკის კონსტიტუციას, იგნორირება გაუკეთეს ქვეყნის კანონებს, დაარღვიეს კონსტიტუცია და კანონები. მათ დაარღვიეს ყველაფერი, რისი დარღვევაც შეიძლებოდა. პარლამენტის წევრებმა უნდა დაასაბუთონ, რატომ მიიღეს ეს გადაწყვეტილება - რიგგარეშე სხდომა ღამით გამართეს. მათ უნდა გაემართლებინათ ამ სხდომის კანონიერება“, - განუცხადა შაკრილმა ჟურნალისტებს.

მანამდე აფხაზეთის საგარეო საქმეთა სამინისტროს ხელმძღვანელმა ინალ არძინბამ განაცხადა, რომ შეთანხმებაში ყველა საჭირო ტექნიკური შესწორება განხორციელდა „რუსეთისა და აფხაზეთის საგარეო საქმეთა სამინისტროებს შორის ნოტების გაცვლის გზით“, რაც, მისი თქმით, „შეესაბამება საერთაშორისო სამართლის ზოგადი ნორმები, ასევე ვენის კონვენცია საერთაშორისო ხელშეკრულებების შესახებ 1969 წლის 23 მაისს“.

რუსეთის ელჩმა მიხეილ შურგალინმა განაცხადა, რომ შეთანხმება არ ითვალისწინებს რუსეთის ფედერაციისთვის იმ მიწის გადაცემას, რომელზეც ობიექტი მდებარეობს.

„ტერიტორია იჯარით არის გაცემული 49 წლით. საკუთრებაში გადავა მხოლოდ შენობები, რომელთა მოვლა-შეკეთებას რუსეთის უშიშროების ფედერალური სამსახური განახორციელებს“, - განაცხადა დიპლომატმა.

მისი თქმით, „მოსახლეობის უმრავლესობისთვის ეს ობიექტი ასოცირდება რუსეთის პრეზიდენტ ვლადიმერ პუტინთან, რომელმაც არაერთხელ გამართა სამუშაო შეხვედრები სახელმწიფო აგარაკში, ასევე საგარეო საქმეთა მინისტრ სერგეი ლავროვთან“.