რესპუბლიკელი კანონმდებელი, კონგრესში ჰელსინკის კომისიის თავმჯდომარე ჯო უილსონი "ამერიკის ხმასთან" აცხადებს, რომ მუშაობს პალატის ლიდერებთან ერთად იმისთვის, რომ "მეგობარი აქტი" საბოლოოდ დამტკიცდეს და ამოქმედდეს. სხვა რესპუბლიკელი კანონმდებლები კი ხაზს უსვამენ იმას, რომ სამართლიანი არჩევნების თემა არჩეული პრეზიდენტის, დონალდ ტრამპისთვის, გამორჩეულად მნიშვნელოვანი საკითხია და შესაბამისად, ასე იქნება მისი ადმინისტრაციისთვისაც.

"მე ძალიან იმედგაცრუებული ვარ. ჩვენ ისევ და ისევ გვერდით უნდა დავუდგეთ ხალხს საქართველოში. "მეგობარი აქტი" უნდა ამოქმედდეს, ის ორპარტიულია და ასევე უნდა დავუდგეთ გვერდით საქართველოს. ამ მამაც, უნარიან ხალხს, მათთვის ყოველივე საუკეთესოს იმედი გვაქვს", - აცხადებს ჯო უილსონი.

ჯო უილსონი "მეგობარი აქტის" ავტორი და წარმდგენია. აქტი საკანონმდებლო ინიციატივაა, რომელიც ჰელსინკის კომისიის თავმჯდომარე უილსონმა საქართველოში გამჭვირვალობის კანონის მიღების და ენტონი ბლინკენის მიერ ამერიკა-საქართველოს ურთიერთობის ყოვლისმომცველი გადახედვის დაწყების პარალელურად საგარეო ურთიერთობათა კომიტეტში წარადგინა. აქტი მოსახლეობის პროდასავლური მისწრაფებების მხარდაჭერას და ანტიდემოკრატიული ქმედებებისთვის პასუხისმგებლობის დაყენებას ითვალისწინებს.

ამერიკელ კანონმდებელთა ნაწილი ამბობს, რომ მხარს უჭერს ქართველი ხალხის დასავლურ მისწრაფებებს და პრეზიდენტ ზურაბიშვილის ძალისხმევას:

"მე პატივს ვცემ იმას, რაზეც საქართველოს პრეზიდენტი მიუთითებს. დავუჭერ მხარს, რა კურსსაც ის მიიჩნევს ქართველი ხალხისთვის სასარგებლოდ, რაც არის დემოკრატიის სრულად აღდგენა საქართველოში. ჩვენ წავიწევთ წინ... ახლა ვმუშაობთ ლიდერებთან იმის უზრუნველსაყოფად, რომ როდესაც "მეგობარი აქტი" კენჭისყრაზე დადგება, დადებითად გადაწყდეს", - ამბობს უილსონი.

აღსანიშნავია ის ფაქტი, რომ "ფოქს ნიუსის" ჟურნალისტის ნანა საჯაიას ინფორმაციით, ჰელსინკის კომისიის თავმჯდომარე, "მეგობარი აქტის" ავტორი, კონგრესმენი ჯო უილსონი 119-ე მოწვევის კონგრესში, რომლის ახალი შემადგენლობაც 3 იანვარს შეიკრიბება საგარეო ურთიერთობების კომიტეტის თავმჯდომარე იქნება.