დონალდ ტრამპის განცხადებით, ის მასობრივი დეპორტაციის შესახებ დიდი ხნის წინ შემუშავებულ გეგმას აუცილებლად შეასრულებს.

"ეს ნამდვილად არ არის ფასის საკითხი. ჩვენ სხვა არჩევანი არ გვაქვს იმ დროს, როდესაც ადამიანები ერთმანეთს კლავენ. ნარკობარონებმა გაანადგურეს ქვეყნები და ახლა ისინი ამ ქვეყნებში დაბრუნებას აპირებენ, რადგან აქ არ რჩებიან,“ - აღნიშნა ტრამპმა NBC News-თან ინტერვიუში.

ამერიკის საიმიგრაციო საბჭოს კონსერვატიული შეფასებით, დონალდ ტრამპის გეგმის ღირებულება $315 მილიარდია. ტრამპის თქმით, მას მიენიჭა მანდატი, რომ ქვეყანაში „საღი აზრი დააბრუნოს“.
აშშ-ის ახლადარჩეულმა პრეზიდენტმა ჯო ბაიდენთან და კამალა ჰარისთან თავისი სატელეფონო საუბრები შეაფასა: 
„ძალიან სასიამოვნო საუბრები გვქონდა. ორივე მხრიდან დიდი პატივისცემა იგრძნობოდა. ბაიდენს ლანჩზე ძალიან მალე შევხვდები. 

ასევე მსოფლიოს 70-მდე ლიდერს ვესაუბრე, მათ შორის ვოლოდიმირ ზელენსკის და ბენიამინ ნეთანიაჰუს, ვლადიმერ პუტინთან კომუნიკაცია არ მქონია - თუმცა ვფიქრობ, რომ ჩვენც მალე ვისაუბრებთ,“ - თქვა ტრამპმა.
შეკითხვაზე, აპირებს თუ არა მისი თანა-კამპანიის ხელმძღვანელის სუზი უილსის თეთრი სახლის შტაბის უფროსად დანიშვნას, ტრამპმა თქვა: "ის, რა თქმა უნდა, კონკურენტული კანდიდატი იქნება. ის შესანიშნავია".