ცნობილი არგენტინელი ფეხბურთელი ლიონელ მესი მომავალი სეზონიდან შეერთებულ შტატებში მიდის. ის საფეხბურთო კლუბ „ინტერ მაიამიში“ იასპარეზებს. ინფორმაციას BBC ავრცელებს.

ამ, ინფორმაციის მიხედვით, მესიმ ამერიკული კლუბი არაბულ „ალ-ჰილალს“ არჩია. ვრცელდებოდა ინფორმაცია, რომ საუდის არაბეთის კლუბი მას 2 წელიწადში 1 მლრდ. დოლარს სთავაზობდა.

ამერიკული გუნდის ხელფასის გარდა მესი შემოსავალს ისეთი ცნობილი ბრენდებიდან, როგორებიცაა Adidas და Apple მიიღებს. მიმდინარე სეზონში მესი ფრანგულ PSG-ში ასპარეზობდა.

ეს პირველი შემთხვევა იქნება, როდესაც ლიონელ მესი არაევროპულ კლუბში ითამაშებს. მანამდე საუდის არაბეთში სათამაშოდ ისეთი ცნობილი ვარსკვლავები წავიდნენ, როგორებიცაა კრიშტიანუ რონალდუ და კარიმ ბენზემა.

მესის სახელი პირველ რიგში კატალონიურ „ბარსელონასთან“ იყო დაკავშირებული, რომელიც მან 2021 წელს დატოვა. „ბარსაში“ ლიონელმა 672 გოლი გაიტანა. ამ კლუბში ის 10-ჯერ გახდა ესპანეთის ჩემპიონი. 4-ჯერ მოიგო ევროპის ჩემპიონთა ლიგა და 7-ჯერ ესპანეთის თასი.