ნოდარ დუმბაძის სახელობის მოზარდ მაყურებელთა პროფესიულ სახელმწიფო თეატრში ლილი იოსელიანის დაბადებიდან 100 წლისთავისადმი მიძღვნილი საიუბილეო საღამო გაიმართა. 

საღამო რამდენიმე ნაწილისგან შედგებოდა. დიდი დარბაზის ფოიეში გამოიფინა ლილი იოსელიანის მიერ შექმნილი ჩანახატები და პორტრეტები, რომლებიც აქამდე საზოგადოებისთვის უცნობი იყო. 

ასევე მოეწყო პრეზენტაცია კულტურის სამინისტროს მხარდაჭერით განხორციელებული პროექტისა „ლილი იოსელიანი 100“. 

პროექტი მოიცავს ორ ნაწილს: ლილი იოსელიანის შესახებ შექმნილ წიგნ-ალბომს და დოკუმენტურ ფილმს.

დიდ დარბაზში გაიმართა პრეზენტაცია წიგნი-ალბომისა „ლილი იოსელიანი“, რომლის ავტორია მოზარდ მაყურებელთა თეატრის სამხატვრო ხელმძღვანელი, რეჟისორი და ლილი იოსელიანის სტუდენტი დიმიტრი ხვთისიაშვილი. 

წიგნ-ალბომში თავმოყრილია დიდი რეჟისორისა და პედაგოგის შესახებ წლების მანძილზე ჟურნალ-გაზეთებში გამოქვეყნებული წერილები, რეცენზიები, შემოქმედებითი პორტრეტები. აქვე პირველად ქვეყნდება ლილი იოსელიანის საზოგადოებისათვის უცნობი პიესა „ტყე-ღრეში“.

საიუბილეო საღამოზე ასევე გაიმართა დოკუმენტური ფილმის, „ლილი იოსელიანი“, პრემიერა. ფილმის რეჟისორები არიან ლაშა კოტრიკაძე და მანანა კვირკველია. 

ლილი იოსელიანმა თავისი საქმიანობით უდიდესი წვლილი შეიტანა ქართული კულტურის განვითარებაში. ერთ-ერთმა გამორჩეულმა რეჟისორმა, პედაგოგმა, პროფესორმა, აკადემიკოსმა და საქართველოს სახალხო არტისტმა გასული საუკუნის 40-იან წლებში საქმიანობა მოზარდ მაყურებელთა თეატრში დაიწყო.

სხვადასხვა წლებში იგი იყო კოტე მარჯანიშვილის სახელობის თეატრის დამდგმელი რეჟისორი და გორის გიორგი ერისთავის სახელობის თეატრის სამხატვრო ხელმძღვანელი. ასევე, დგამდა სპექტაკლებს შოთა რუსთაველის სახელობის, რუსთავისა და ქუთაისის თეატრებში.

ლილი იოსელიანი პედაგოგიურ საქმიანობას 67 წლის განმავლობაში (1947-2014 წლებში) ეწეოდა.

კულტურის სამინისტროს მხარდაჭერით, ლილი იოსელიანის იუბილე მიხეილ თუმანიშვილის სახელობის თეატრშიც აღინიშნა. თეატრის სცენაზე ლილი იოსელიანის ჩაფიქრებული სპექტაკლი, ჰენრიკ იბსენის ,,ჯონ გაბრიელ ბორკმანი" დაიდგა, რომლის რეჟისორია ამერიკაში მცხოვრები რუმინელი რეჟისორი ადრიან გიურგეა. 

ლილი იოსელიანის საიუბილეო ღონისძიებები კულტურის სამინისტროს ხელშეწყობით გაიმართა.