7 აპრილს, თბილისის დროით 21:00 საათზე, სერია A-ს 29-ე ტურში გათამაშების ლიდერი "ნაპოლი" "ლეჩეს" ესტუმრება. 

La Gazzetta dello Sport-ის ცნობით, "პარტენოპეის" მთავარი მწვრთნელი ლუჩანო სპალეტი შემადგენლობაში ოთხი ცვლილების განხორციელებას გეგმავს.

როგორც გამოცემა აღნიშნავს, ჩემპიონთა ლიგის 1/4-ფინალის წინ ლუჩანო რამდენიმე მოთამაშეს დასვენების საშუალებას მისცემს.

"დიდი ალბათობით, კიმ მინ-ჯე დაისვენებს და მას ხუან ჟესუსი შეცვლის, თავის შანსს ჯაკომო რასპადორიც მიიღებს და ჯოვანი სიმეონეს ადგილს დაიკავებს, მოსალოდნელია, რომ მატჩს პირველივე წუთებიდან ელიფ ელმასი და ნტანგი ნდომბელე დაიწყებენ" - წერს გამოცემა.

შეგახსენებთ, "ნაპოლი" სერია A-ს 71 ქულით ლიდერობს, უახლოეს მდევარ "ლაციოს" კი 16 ქულით უსწრებს.