გასულ სეზონში ხვიჩა კვარაცხელიას მიერ „ატალანტას“ კარში გატანილი ბურთი იტალიის სერია A-ში 2023 წლის საუკეთესო გოლად აღიარეს – ინფორმაციას გამოცემა „გაძეტა დელო სპორტი“ ავრცელებს.

საქართველოს ნაკრებისა და „ნაპოლის“ თავდამსხმელს ჯილდო იტალიის წლის ტრადიციულ საფეხბურთო დაჯილდოებაზე გადასცეს, რომელიც მილანში გაიმართა.

შეგახსენებთ, რომ ხვიჩა კვარაცხელიამ გასულ სეზონში, სერია A-ს 26-ე ტურში, 11 მარტს „ატალანტას“ შესანიშნავი გოლი გაუტანა, რომელიც ჯერ – ტურის, შემდეგ – თვის, ახლა კი წლის საუკეთესო გოლად აღიარეს.

დაჯილდოებაზე იტალიური მედიის ყურადღების ცენტრში ქართველი თავდამსხმელისა და მისი ყოფილი მწვრთნელის, იტალიის ნაკრების ამჟამინდელი დამრიგებელის, ლუჩანო სპალეტის თბილი შეხვედრა მოექცა.