კოალიცია "ერთიანობა - ნაციონალური მოძრაობის" ინფორმაციით, ღამით პარტიის აქტივისტებს, რომლებიც ვაჟა-ფშაველას გამზირზე პლაკატებს აკრავდნენ, გაურკვეველი პირები დაუპირისპირდნენ. ადგილზე გამოიძახეს პოლიციაც. აქტივისტები ამბობენ, რომ იყო სიტყვიერი შეურაცხყოფა, შეხლა-შემოხლა. 

"პლაკატებს ვაკრავდით, მე და ორი მეგობარი ვიყავით, უცებ მანქანით მოაჩერეს, გადმოვიდა 15-მდე დაკუნთული ნიღბიანი ტიპი, ზოგს პირბადე ეკეთა, ზოგს არა. მოვარდნენ, პლაკატები ჩამოგვიხიეს, სიტყვიერი შეურაცხყოფა მოგვაყენეს, გვაგინეს... ავდექი და გადავიღე ვიდეო, რომ ნახეს ვიდეო გადავიღე ეგრევე მე მომივარდნენ, რომ სასწრაფოდ წამეშალა ვიდეო, თორემ სახეს დამიმტვრევდნენ, ტელეფონს დამიმტვრევდნენ, რაღაც საშინელებები", - ყვება აქტივისტი.