ჟოზე მოურინიო „რომას“ მთავარი მწვრთნელის თანამდებობიდან გაათავისუფლეს. 60 წლის პორტუგალიელმა „რომა“ 2021 წლის მაისში ჩაიბარა, 2022 წელს კლუბთან ერთად კონფერენციების ლიგა მოიგო, 2023 წელს კი ევროპა ლიგის ფინალში გავიდა.

სერია A-ს მიმდინარე გათამაშებაში „რომა“ მეცხრე ადგილზეა და ჩემპიონთა ლიგის ზონას 5 ქულით ჩამორჩება. გასულ კვირაში „რომა“ იტალიის თასის გათამაშებას თანაქალაქელმა „ლაციომ“ გამოთიშა.

„რომას“ ოფიციალურ განცხადებაში ნათქვამია, რომ კლუბი მადლობას უხდის მოურინიოს ერთგულებისთვის, თუმცა კლუბის ინტერესებიდან გამომდინარე, „ცვლილებები აუცილებელი იყო“.