ესპანურმა გამოცემა „მარკამ“ ყველა დროის საუკეთესო ფეხბურთელად არგენტინელი ლიონელ მესი დაასახელა.

„ინტერ მაიამის“ თავდამსხმელს „მარკას“ მიერ მომზადებული სპეციალური ჯილდო გამოცემის დირექტორმა, ხუან იგნასიო გალიარდომ გადასცა. ჯილდოზე მესის საფირმო გოლის აღნიშვნაა გამოსახული.

მეორე ადგილზე პორტუგალიელი კრიშტიანო რონალდო გავიდა, ხოლო მესამეზე – ლეგენდარული ბრაზილიელი პელე.

ცოტა ხნის წინ 37 წლის ლიონელ მესიმ MLS-ის რეგულარული სეზონი მოიგო და კარიერაში 46-ე ტიტული მიითვალა. შეგახსენებთ, რომ ის „ოქროს ბურთის“ რვაგზის გამარჯვებულია.