"მარეგულირებელი ორგანოს მიერ 2021 წლის ბოლომდე გადაწყვეტილების მიღება შეუძლებელია. ავტორიზაციის პროცესი, სავარაუდოდ, 2022 წლამდე გადაიდება", - იუწყება Reuters-ის ანონიმური წყარო. 

ევროპის მედიკამენტების სააგენტომ (EMA) „შესაძლოა, მომავალი წლის პირველ კვარტალში, საბოლოოდ გადაწყვიტოს, დაამტკიცებს თუ არა Sputnik V-ს“. თუმცა ეს დამოკიდებული იქნება იმაზე, წარუდგენს თუ არა რუსული მხარე ევროპის მედიკამენტების სააგენტოს იმ ინფორმაციას, რომელიც, ნოემბრის ბოლოს, საკითხის მიმოხილვისთვის არის საჭირო. წყაროზე დაყრდნობით, ევროპის მედიკამენტების სააგენტომ რუს მწარმოებელს Sputnik V-ის ვაქცინის ინგრედიენტებისა და მისი ჩამოსხმის შესახებ „უფრო სრული დოსიე“ სთხოვა.

რუსი მეცნიერების განცხადებით, Sputnik V Covid-19-ის წინააღმდეგ შემუშავებული პირველი ვაქცინაა მსოფლიოში. მოსკოვის განცხადებით, ევროკავშირისა და ჯანდაცვის მსოფლიო ორგანიზაციის (WHO) მიერ Sputnik V-ისთვის ავტორიზაციის მინიჭება საშუალებას მისცემს ვაქცინის მწარმოებლებს კონკურენცია გაუწიონ დასავლურ Pfizer-სა და Moderna-ს და Sputnik V-ით ვაქცინირებული რუსებისთვის საერთაშორისო მასშტაბით მოგზაურობა გაამარტივონ.