სსიპ ცხინვალის ივანე მაჩაბლის სახელობის პროფესიული სახელმწიფო დრამატული თეატრის სამხატვრო ხელმძღვანელის თანამდებობაზე რეჟისორი გოჩა კაპანაძე დაინიშნა. იგი ამ პოზიციას ოთხი წლის ვადით, მიმდინარე წლის ოთხი დეკემბრიდან დაიკავებს. 

გოჩა კაპანაძეს  ამ თეატრის სამხატვრო ხელმძღვანელის პოზიციაზე ამჟამინდელი უფლებამოსილების ვადა 2022 წლის 3 დეკემბერს ამოეწურება.

სსიპ ცხინვალის ივანე მაჩაბლის სახელობის პროფესიულ სახელმწიფო დრამატულ თეატრში კონკურსი მიმდინარე წლის 17 ოქტომბერს გამოცხადდა და მასში მხოლოდ აღნიშნულმა კანდიდატმა მიიღო მონაწილეობა, რის საფუძველზეც გოჩა კაპანაძის კანდიდატურა კულტურის მინისტრმა განსახილველად კულტურის სამინისტროსთან არსებულ პროფესიული სახელმწიფო თეატრების სამხატვრო ხელმძღვანელების კანდიდატთა შესარჩევ სარეკომენდაციო საბჭოს წარუდგინა. 

საბჭოს სხდომაზე კენჭი უყარეს გოჩა კაპანაძის კანდიდატურას და ერთხმად გადაწყვიტეს სსიპ ცხინვალის ივანე მაჩაბლის სახელობის პროფესიული სახელმწიფო დრამატული თეატრის სამხატვრო ხელმძღვანელად სამინისტროსთვის სწორედ აღნიშნული კანდიდატურა წარედგინათ. 

შედეგად, გოჩა კაპანაძე კვლავ სსიპ ცხინვალის ივანე მაჩაბლის სახელობის პროფესიული სახელმწიფო დრამატული თეატრის სამხატვრო ხელმძღვანელად დაინიშნა, აცხადებენ კულტურის სამინისტროში.