ოკუპირებული ე.წ. სამხრეთ ოსეთის მთავრობის წყარომ კომენტარი გააკეთა რუსეთიდან საქართველოში ტრანზიტის შესაძლო გახსნის შესახებ ინფორმაციაზე. როგორც უკვე გავრცელდა ინფორმაცია, ცხინვალის გავლით გზის გახსნის წინადადება ვლადიკავკაზში გამართულ რუსულ-ქართული ბიზნეს საბჭოს სხდომაზე გაკეთდა. ამის შესახებ „ეხო კავკაზა“ წერს.

„ყოველთვის ვამბობდი და ვამბობდი: რა პირობებში შეგვიძლია ამის მიღება? ეს ჩვენთვის ძალიან მნიშვნელოვანია. თუ ეს თანაბარი პირობებია და ჩვენ ვართ ამ ჯაჭვის ღირსეული რგოლი, მაშინ რატომაც არა? როგორი განვითარება შეიძლება გვქონდეს ჩიხში ყოფნით?! რა პირობებში და ვინ ვართ ამ თამაშში - ეს საკითხავია“, - ამბობს „საფა ცხინვალის“ ტელეგრამ-არხის თანამოსაუბრე.

მისი თქმით, ამ საკითხზე მიძღვნილ დისკუსიაზე სამხრეთ ოსური მხარის წარმომადგენლები არ იყვნენ მიწვეულნი.

„რა თქმა უნდა, გამიკვირდა, რომ მთავარ განხილვებზე არ მიგვიწვიეს. რატომ არ მიიწვიეს სამხრეთ ოსეთის ხელისუფლების წარმომადგენლები? იქ ხომ ჩრდილოეთ ოსეთისა და ინგუშეთის პრემიერ-მინისტრები იყვნენ, მაგრამ ჩვენებს არ აცნობეს“, - დასძინა მან.

ამასთან, წყარომ ადრე გამართული არაფორმალური შეხვედრის დეტალების შესახებაც ისაუბრა. იქ დაისვა რუსეთ-საქართველოს სარკინიგზო კომუნიკაციის აღდგენის საკითხი.

„ადრე არაფორმალური დისკუსია გაიმართა პრეზიდენტის ადმინისტრაციასთან და რუსეთის ფედერაციის სავაჭრო-სამრეწველო პალატის ხელმძღვანელობასთან. ძირითადად განიხილავდნენ „ზემო ლარსს“, რადგან პუნქტი ნაკადებს ვერ უმკლავდება. ამ შეხვედრაზე ინგუშების შეთავაზება იყო საქართველოსკენ რკინიგზის აშენება მათ ტერიტორიაზე, ხოლო სამხრეთ ოსურმა მხარემ შემოგვთავაზა, რომ რკინიგზა ჩვენზე გასულიყო - სამხრეთ და ჩრდილოეთ ოსეთს შორის“, - განაცხადა წყარომ.