ჰოლივუდის ვარსკვლავი ბრედ პიტი ფორმულა 1-ის ბოლიდით გასახურებელ წრეს გაივლის ბრიტანეთის გრანპრის სხვა მონაწილეებთან ერთად, – ამის შესახებ გაზეთი The Sun წერს.

პიტის ბოლიდით მოძრაობის კადრები გამოყენებული იქნება ფილმში, რომელშიც ამერიკელი მსახიობი მთავარ როლს ასრულებს. სურათი მომავალ წელს უნდა გამოვიდეს კინოგაქირავებაში, თუმცა, ჯერჯერობით, სახელწოდება არ აქვს. პიტი ფილმში ფორმულა 1-ის ვეტერანს თამაშობს, რომელიც სპორტიდან წასვლის შემდეგ ახალგაზრდა პილოტის დამრიგებელი ხდება.

ფილმს იღებს Dawn Apollo Films – ფორმულა 1-ში მსოფლიოს შვიდგზის ჩემპიონის, ბრიტანელი ლუის ჰემილტონის ახალი პროდუსერული კომპანია. ამასწინდელ ინტერვიუში მან განაცხადა, რომ ეს სურათი გახდება ისტორიაში საუკეთესო ფილმი ავტოსპორტის შესახებ.

დიდი ბრიტანეთის გრანპრი სილვერსტოუნის ავტოდრომზე 9 ივლისს გაიმართება.