რუსეთთან სტრატეგიული პარტნიორობა აფხაზეთს "გარკვეულ ვალდებულებებს" აკისრებს. ამის შესახებ განაცხადა ოკუპირებული აფხაზეთის დეფაქტო ლიდერმა ასლან ბჟანიამ აშშ-ის საერთაშორისო განვითარების სააგენტოს (USAID) საქმიანობაზე შეზღუდვების კომენტირებისას.

„თუ (USAID) 2012 წლიდან რუსეთის ფედერაციის ტერიტორიაზე აკრძალულია... ამ რთულ პირობებში, როცა არის საომარი მოქმედებები, რეალურად არის ფართომასშტაბიანი ომი, შეგვიძლია, როგორც მოკავშირეებსა და სტრატეგიულ პარტნიორებს, დავუშვათ რუსეთის მიმართ მტრულად განწყობილი არამეგობრული ორგანიზაციის საქმიანობა აქ, აფხაზეთის ტერიტორიაზე?“ - მან თქვა.

ბჟანიამ მიმართა ოკუპირებული აფხაზეთის ე.წ. საგარეო საქმეთა მინისტრს ინალ არძინბას.

„ასეა საჭირო, ინალ, მკვეთრ საგნებზე საუბარი. დიპლომატიური ენა, რა თქმა უნდა, მიმზიდველია, მაგრამ ყოველთვის არ არის გასაგები საზოგადოებისთვის და უბრალო ხალხისთვის. თუ მოკავშირეები ვართ, თუ სტრატეგიული პარტნიორები ვართ, ეს გარკვეულ ვალდებულებებს გვაკისრებს“, - დასძინა მან.

ბჟანიას თქმით, „რუსეთის ფედერაციასთან ურთიერთობის წერტილი“ კიდევ უფრო მაღალი უნდა იყოს, რადგან ეს არის აფხაზი ხალხის ფუნდამენტური ინტერესი.

შეგახსენებთ, რომ გასული წლის ბოლოს ოკუპირებული აფხაზეთის დეფაქტო ხელისუფლებამ USAID-ის პროექტების აკრძალვის შესახებ გამოაცხადა. გარდა ამისა, სამხრეთ კავკასიაში USAID-ის მისიის ხელმძღვანელი ჯონ პენელი აფხაზეთში პერსონა ნონ გრატად გამოცხადდა.