არ ვიცი, რა არის გეგმა, რადგან არ ვართ აქციის ორგანიზატორები, თუმცა ვაგრძელებთ ბრძოლას, როგორც სამართლებრივ, ისე პოლიტიკურ სივრცეში, რათა ხელახალი არჩევნების ჩატარების გზით და ყველა საკანონმდებლო ნორმის გამოსასწორებლად, რომელმაც დაუშვა არჩევნებში სისტემური გაყალბება, ქვეყანა დავაბრუნოთ კონსტიტუციურ სივრცეში, – ამის შესახებ პარტია „გახარია საქართველოსთვის“ წევრმა, თეონა აქუბარდიამ განაცხადა.

მისივე თქმით, მშვიდობიანი პროტესტი არის წინააღმდეგობის ერთ-ერთი და არა ერთადერთი განზომილება.

„კარგად უნდა გესმოდეთ, რომ როცა საუბარია საპროტესტო აქციებზე, ჩვენ არ ვართ ორგანიზატორები, თუმცა ვუერთდებით კონსტიტუციის უფლების გამოხატვის შესაძლებლობას, რაც მშვიდობიან პროტესტს გულისხმობს. ეს არის ერთ-ერთი და არა ერთადერთი წინააღმდეგობის განზომილება, რათა ქვეყანა დავაბრუნოთ დემოკრატიულ სივრცეში. მე არ ვიცი, რა არის გეგმა, რადგან არ ვართ აქციის ორგანიზატორები, თუმცა ჩვენ ვაგრძელებთ ბრძოლას, როგორც სამართლებრივ, ისე პოლიტიკურ სივრცეში, რათა ხელახალი არჩევნების ჩატარების გზით და ყველა საკანონმდებლო ნორმის გამოსასწორებლად, რომელმაც დაუშვა არჩევნებში სისტემური გაყალბება, შევცვალოთ და ქვეყანა დავაბრუნოთ იმ კონსტიტუციურ სივრცეში, რომელიც არის ხალხის მხრიდან განსაზღვრული.

გუშინ, ჩვენ გვქონდა სასამართლო პროცესი, ვასაჩივრებდით ცესკო-ს შემაჯამებელ ოქმს და ესაა სამართლებრივი ბრძოლის განზომილება. ასევე, აქტიური კომუნიკაცია გვაქვს ჩვენს დასავლელ პარტნიორებთან, რომ არ მოხდეს ამ გაყალბებული არჩევნების ლეგიტიმაცია, არ მოხდეს უვიზო რეჟიმის შეჩერება უბრალო მოქალაქეებისთვის და პასუხისმგებლობა და შესაბამისი ქმედებები განხორციელდეს ივანიშვილის იმ ძალაზე, რომელმაც ქვეყნის კონსტიტუციას დაუპირისპირა პოლიციური ძალა და მოჰპარა ხალხს არჩევანის თავისუფლება“, – განაცხადა აქუბარდიამ.