უეფა-მ დაადასტურა, რომ ესპანეთის ნაკრების ფორვარდი ალვარო მორატა არ გამოტოვებს ევრო 2024-ის ნახევარფინალს საფრანგეთის წინააღმდეგ.

თავდაპირველად იტყობინებოდნენ, რომ 31 წლის ფეხბურთელმა მეოთხედფინალში ყვითელი ბარათი მას შემდეგ მიიღო, რაც მისმა გუნდმა გამარჯვების გოლი გაიტანა დამატებით დროში გერმანიის წინააღმდეგ.

სატელევიზიო რეპორტაჟსა და უეფა-ს ოფიციალურ ვებგვერდზე თავდაპირველად მიუთითეს, რომ ესპანეთის ნაკრების კაპიტანმა გაფრთხილება მიიღო, მაგრამ მოგვიანებით ყვითელი ბარათი გააუქმეს. თავად მორატამ, რომელიც მიკელ მერინოს გოლისას მინდორზე აღარ იმყოფებოდა, ჟურნალისტებს აცნობა, რომ გაფრთხილება არ მიუღია.

მორატას უკვე ჰქონდა ერთი ყვითელი ბარათი მიღებული საქართველოსთან მერვედფინალურ მატჩში და კიდევ ერთი გაფრთხილების შემთხვევაში ნახევარფინალის გამოტოვება მოუწევდა.

ცნობილია, რომ ესპანეთის ნაკრებში დისკვალიფიკაციის გამო საფრანგეთთან ნახევარფინალს გამოტოვებენ დანი კარვახალი და რობინ ლე ნორმანდი. ასევე, ტრავმის გამო ვერ ითამაშებს პედრი.