ალმათი საპროტესტო აქციებით გამოწვეული არეულობის ერთ-ერთი მთავარი ეპიცენტრი იყო. 

ყაზახეთის შინაგან საქმეთა სამინისტროს განცხადებით, ქვეყნის მასშტაბით, 8000 ადამიანია დაკავებული. 

ყაზახეთში საპროტესტო გამოსვლები 2 იანვარს დაიწყო ქვეყნის დასავლეთში მდებარე მანგისტაუს ოლქიდან და შემდეგ სხვა რეგიონებშიც გავრცელდა. პროტესტის მიზეზი გათხევადებული ბუნებრივი გაზის გაძვირება იყო. 4 იანვარს, გვიან ღამით, ყაზახეთის მთავრობა გადადგა, თუმცა, 5 იანვარს საპროტესტო გამოსვლები გაგრძელდა; ხელისუფლების შეიარაღებულმა მოწინააღმდეგეებმა მერიისა და პრეზიდენტის ყოფილი რეზიდენციის შენობები და ქალაქის აეროპორტი დაიკავეს. 5 იანვარს, ყაზახეთის პრეზიდენტმა ქვეყანაში საგანგებო მდგომარეობა გამოაცხადა. 

გასულ კვირას, ყაზახეთში წესრიგის აღდგენის მიზნით, კოლექტიური უსაფრთხოების ხელშეკრულების ორგანიზაციის "სამშვიდობო კონტინგენტი" გაიგზავნა.