„ნაპოლის” შემტევი ხვიჩა კვარაცხელია მიმდინარე სეზონში მსოფლიოს ერთ-ერთი საუკეთესო ფეხბურთელია. ქართველის ანგარიშზე 14 გოლი და 16 საგოლე გადაცემაა. შესაძლოა, „ლივერპულმა“ თავდამსხმელისთვის „ნაპოლის“ 130 მილიონი ევრო შესთავაზოს – ინფორმაციას Fichajes-ი ავრცელებს.

„22 წლის გარემარბი განსაკუთრებულ ფორმაშია და მისმა შესანიშნავმა გამოსვლამ იტალიასა და ევროპაში არაერთი გრანდის ყურადღება მიიპყრო.

„ლივერპული“ მოხიბლულია ქართველი ფეხბურთელის შეძენის იდეით და შესაძლოა, სეზონის ბოლოს სოლიდური ფინანსური შეთავაზება წარადგინოს. ინგლისელებს შეუძლიათ 22 წლის მარცხენა გარემარბში იტალიელებს რეკორდული, 130 მილიონი ევრო შესთავაზონ.

კვარაცხელია მსოფლიო ფეხბურთის ერთ-ერთი საუკეთესო ახალგაზრდაა, იგი „ლივერპულისთვის“, შესაძლოა, სენსაციური შენაძენი გახდეს. მას აქვს უნარები, მერსისაიდელთა შეტევა გააძლიეროს, იურგენ კლოპის გუნდს ტემპი, არაპროგნოზირებადობა და გოლები შემატოს.

22 წლის მოთამაშე ამ სეზონში იტალიური კლუბის მთავარი ფიგურაა. ის „ნაპოლის“ დაეხმარა იტალიის ჩემპიონატის ცხრილის სათავეში ასვლასა და ჩემპიონთა ლიგის მეოთხედფინალში გასვლაში“, – წერია Fichajes-ში გამოქვეყნებულ სტატიაში.