10 ქვეყანა და 53 კონცერტი - ქართული ნაციონალური ბალეტი "სუხიშვილები", წარმატებული ორთვიანი საგასტროლო მოგზაურობიდან დაბრუნდა. ევროპის სცენის დაპყრობის შემდეგ, ანსამბლი ფილარმონიის დიდ საკონცერტო დარბაზში ქართველი მაყურებლის წინაშე წარდგება.

ქართული, ხორუმი, სვანური,ზეკარი, ჯუთა - ორსაათიანი პროგრამა შერეულია - მაყურებლისთვის წარმოდგენილი იქნება როგორც კლასიკური ცეკვები ასევე, ახალი ქორეოგრაფიული კომპოზიციები. საახალწლო კონცერტები დღეიდან დაიწყება.

პარიზი, ვენა, ბერლინი, რომი, პრაღა - 75 წლიანი ისტორიის მქონე ანსამბლის საშემოდგომო ტურნე, საკმაოდ დატვირთული აღმოჩნდა - თუმცა, თავად სუხიშვილებისთვის ერთ-ერთი ყველაზე დასამახსოვრებელი მაინც ბრიუსელში ანშლაგით ჩატარებული კონცერტია. ანსამბლის წევრებმა ფესტივალ "ევროპალიას" ფარგლებში მონაწილეობისას შეიტყვეს, რომ საქართველოს ევროკავშირის წევრობის კანდიდატის სტატუსი მიენიჭა. ბრიუსელის ნაციონალურ თეატრში, სუხიშვილებმა სიმბოლურად ევროკავშირისა და საქართველოს დროშები გადმოფინეს.

ფილარმონიის დიდ საკონცერტო დარბაზში სუხიშვილების საახალწლო სერია დღეს დაიწყება და 25 დეკემბრის ჩათვლით გაგრძელდება.