საქართველო ყველანაირად ცდილობს თავი აარიდოს ძალის გამოუყენებლობის შესახებ დოკუმენტზე ხელმოწერას. სამხრეთ ოსეთი ამ საკითხზე დიდი ხანია მუშაობს, „მაგრამ ჯერჯერობით შედეგის მიღწევა ვერ მოხერხდა“- ამის შესახებ ოკუპირებული ე.წ. სამხრეთ ოსეთის რესპუბლიკის დეფაქტო პრეზიდენტის სახელმწიფო მრჩეველმა, ჟენევის დისკუსიებზე სამუშაო ჯგუფის ხელმძღვანელმა ვიდეოხიდის დროს კონსტანტინ კოჩიევმა განაცხადა.

კოჩიევმა გაიხსენა, რომ იყო პერიოდი, როდესაც საქართველო პრაქტიკულად დათანხმდა ამ დოკუმენტის ხელმოწერას, მაგრამ საბოლოოდ კვლავ უარი თქვა.

„ჟენევის დისკუსიები არის პროცესი, რომელიც შექმნილია სტაბილურობისა და უსაფრთხოების უზრუნველსაყოფად. დღეს ჩვენ ვხედავთ, რომ ეს უზრუნველყოფილია", - თქვა მან.