თუ რამე იყო ძალადობა, ეს იყო პარლამენტის თავმჯდომარესთან მიჭრა და ორ მანდატურთან ჭიდაობა – შალვა პაპუაშვილი

ივლისი 19, 13:11
0
48

„თუკი რამე იყო ძალადობა, ეს იყო პარლამენტის თავმჯდომარესთან მიჭრა და სპიკერატის მისადგომთან ორ მანდატურთან ჭიდაობა და დაუმორჩილებლობა, რომლებიც ამის აღკვეთას ცდილობდნენ“, – ამის შესახებ საპარლამენტო უმრავლესობის ერთ-ერთმა ლიდერმა შალვა პაპუაშვილმა განაცხადა, რითაც ოპოზიციონერ დეპუტატ თინა ბოკუჩავასთან დაკავშირებით პლენარული სხდომის დარბაზში გუშინ მომხდარ ინციდენტთან დაკავშირებულ კითხვას უპასუხა.

მისივე თქმით, ძალადობა არ არის მიჭრის, ჭიდაობის და დაუმორჩილებლობის აღკვეთა, მათ შორის, დეპუტატის მიერ.

„სამწუხაროდ, ოპოზიციის ქცევის გამო ჩვენ გუშინაც და მანამდე სხდომაზეც ფაქტობრივად მანდატურის ფუნქციის შეთავსება მოგვიწია, რაც არავის სიამოვნებს. ზოგადად, მნიშვნელოვანია, რომ ის უმსგავსობა, რასაც ჩვენ ბოლო რამდენიმე სხდომა ვხედავთ და რისი ტრადიციად დამკვიდრებაც „ნაციონალურ მოძრაობას“ სურს, პარლამენტში ვერ დამკვიდრდეს. სპიკერატი არის თავმჯდომარის ადგილი. ტრიბუნა – მომხსენებლის. ყველამ, მიუხედავად სქესისა, პატივი უნდა სცეს ქვეყნის უმაღლესი წარმომადგენლობითი ორგანოს ელემენტარულ წესებს. ისტერიის და წარმოდგენების ადგილი პარლამენტში არ არის“, – განაცხადა პაპუაშვილმა.

ინფორმაციისთვის, 18 ივლისს, პარლამენტში, შს მინისტრ ვახტანგ გომელაურის სიტყვით გამოსვლის დაწყებისას, ოპოზიციის მიერ დაფიქსირებულ პროტესტს უმრავლესობისა და ოპოზიციის წევრებს შორის სიტყვიერი დაპირისპირება მოჰყვა. კერძოდ, „ნაციონალური მოძრაობის“ ერთ-ერთმა ლიდერმა თინა ბოკუჩავამ სპიკერატისთვის განკუთვნილ ადგილზე ასვლა სცადა, თუმცა უმრავლესობის დეპუტატმა შალვა პაპუაშვილმა ის ფაქტობრივად, ხელში აიყვანა და ადგილიდან ასე გაიყვანა, რასაც ბოკუჩავასა და პაპუაშვილს შორის სიტყვიერი შელაპარაკება მოჰყვა.