საჭირო არ არის, არც თურქების აშენებული, არც უცხოპლანეტელების, არც ამერიკელების და არც ივანიშვილის და კალაძის – სააკაშვილი

ივნისი 1, 18:14
0
327

“მე ვარ ადამიანი, ვინც გაანათა საქართველო ჩემს გუნდთან ერთად. ვინც ამას დამაყვედრის, ის არის უბრალოდ იდიოტი”, – ამის შესახებ საქართველოს ყოფილმა პრეზიდენტმა, მიხეილ სააკაშვილმა ფეისბუქჩართვისას განაცხადა:

სააკაშვილის თქმით, მისი ხელისუფლებაში ყოფნის დროს ყველაზე დაბალი დენის ტარიფი იყო.

-„ჩვენ დავასრულეთ კორუფცია შევარდნაძისეულ ენერგეტიკაში, ავამუშავეთ ჰესები, დავიწყეთ ახლების მშენებლობა, ჩვენ მივიყვანეთ დენი თითოეული ქართველის სახლში. ერთ-ერთი ყველაზე დაბალი დენის ტარიფი გვქონდა ყოფილ პოსტსაბჭოთა ქვეყნებს შორის. ისე კი არ იყო ახლა რომ გაუძვირეს ელექტროენერგია ყველა ბიზნესს და გაძვირდა გაზი. ჩვენ გვქონდა ერთ-ერთი ყველაზე დაბალი ტარიფი. გვქონდა მზის ენერგიის განვითარების გეგმები, „საქართველო ეკოლოგიურად სუფთა ქვეყნის პროექტი“ ვერა ქობალიასთან ერთად. მიმაჩნია, – საქართველოს ეკონომიკური განვითარება არის დიდი ქალაქის აშენება შავ ზღვაზე, მაღალი ტექნოლოგიების, სერვისების ექსპორტზე. ჩვენს საკმარის დენს ჩვენ ყოველთვის ვიშოვით. რაც შეეხება დამატებით თურქეთში ან სადმე დენის გაყიდვას, უკაცრავად, მაგრამ ეს არ არის ჩვენი ცხოვრების მთავარი ამოცანა და მიზანი. ჩვენი მთავარი მიზანია ჩვენი ხალხის კეთილდღეობა. მას შემდეგ, რაც ჩვენ „ნამახვანჰესზე“ დავიწყეთ ლაპარაკი, საქართველოს ეკონომიკური სტრუქტურა შეიცვალა და უკაცრავად, ვიღაცამ, უცხოპლანეტელმა კი არ შეცვალა, მე შევცვალე ტურიზმით. ძალიან ბევრი სხვა სფერო გაჩნდა, საიდანაც შეიძლება, რომ საქართველომ შემოსავალი მიიღოს.

ძალიან ზუსტი განმარტებები მაქვს ყველაფერზე. ერთ ადგილზე ნუ გავიყინებით დროსა და სივრცეში. ის, რაც იყო აქტუალური 15 წლის წინ, აღარ არის აქტუალური დღეს. მე როცა ნამახვანზე ვლაპარაკობდი, „ნოკია“ იყო ყველაზე დიდი ფუფუნება, დღეს კი სულ სხვა ტელეფონია, ხუთ წელიწადში კიდევ სხვა იქნება. ზუსტად ასევეა ენერგეტიკის ტექნოლოგიები. არ უნდა დაგვაგოიმონ ახლა, რომ ვაიმე, სიბნელეა დიდი ჰესის წინააღმდეგი თუ ხარ. ვამბობ, ვიყავი მომხრე, მაგრამ დღეს აღარ არის აქტუალური, რადგან ტექნოლოგიები, კონტექსტი, ეპოქა შეიცვალა. როგორც ექცევიან ამ ხალხს, მათი დიდი ნაწილი საერთოდ არ არის ჩემი მხარდამჭერი, მაგრამ მაქვს სამართლიანობის განცდა, სწორ საქმეს ემსახურებიან და მათ ძალიან არასწორად ექცევიან. სწორია, რომ ეს დიდი კაშხალი ახლა საჭირო არ არის, არც თურქების აშენებული, არც უცხოპლანეტელების, არც ამერიკელების და არც ივანიშვილის და კალაძის“.