“კორონავირუსი 6 თვეში მორჩება” – არის თუ არა “შავი სოკოს” გავრცელების საშიროება საქართველოში? – გიორგი ფხაკაძე

ივნისი 2, 14:57
0
307

პროფესორი, ორგანიზაციის – „აკრედიტაცია საზღვრების გარეშე“ – ხელმძღვანელი, გიორგი ფხაკაძე:

კარგი ამბავი -კიდევ ერთი ავტორიზებული ვაქცინა გვაქვს – „სინოვაკი“ მეორე ჩინური ვაქცინაა, რომელმაც ჯანდაცვის მსოფლიო ორგანიზაციის ავტორიზაცია მიიღო;

საერთოდ, მე ვიყავი, ვარ და ვიქნები მანიპულაციების წინააღმდეგი და ჩინეთთან ეს პრობლემა რომ იყო, ამაში ორი აზრი არ არსებობს. თუმცა ჩინელები უფრო ჭკვიანები აღმოჩდნენ, ვიდრე რუსები.

ჩინეთმა „სინოვაკზე“ კვლევები აწარმოა ბრაზილიაში და ეს ვაქცინა ეფექტური აღმოჩნდა. უნდა გვიხაროდეს, ოღონდ ფრთხილად!

შედარებისათვის – „სინოფარმის“ შემთხვევაში კვლევა ჩატარდა ძირითადად ახალგაზრდა მამაკაცებში 18-დან 59 წლამდე, ჯანმრთელ პოპულაციაში. „სინოვაკზე“ კვლევები უფრო რეალურ ცხოვრებაში ჩატარდა და არსებულ მონაცემებში ასაკობრივი ზღვარი არ არის ანუ გამოიყენება 18 წლის ზევით.

კარგია, რომ უკვე ბევრი ვაქცინა გვაქვს, მაგრამ ფაქტია, რომ პირველ ადგილზეა „ფაიზერი“, შემდეგ „მოდერნა“ და ა.შ..

ნებისმიერი ვაქცინის მთავარი დატვირთვა არის ის, რომ ვაქცინირების შემდეგ ვაქცინირებული ადამიანი დაინფიცირების შემთხვევაში არ მოხვდება რეანიმაციაში და არ გარდაიცვლება. თუმცა ვაღიაროთ, რომ ინფიცირებისგან 100%-იანი დაცვა არც ერთი ვაქცინის შემთხვევაში არ არსებობს; არის დაცვის სხვადასხვა პროცენტულობა;

„სინოვაკის“ შემთხვევაში ჩინელებმა ჭკუა ისწავლეს. რომ გითხრათ, იდეალური ინფორმაცია წარმოადგინეს-მეთქი, არა, მაგრამ საკმაოდ შთამბეჭდავი კვლევა დადეს ბრაზილიის მაგალითზე. თუმცა ბრაზილია ხომ არ არის მარტო, წარმოადგინონ სხვა ქვეყნების, ევროპის და ა.შ. ქვეყნების მაგალითზე და ვნახოთ.

არ დაგავიწყდეთ – „სინოვაკი“ არის მხოლოდ ჯანმოს მიერ აკრედტირებული. ამ ვაქცინას არა აქვს არც აშშ-ში, არც ევროპაში აღიარება და ამ ქვეყნებში ვალიდურობა არა აქვს.

მიუხედავად ყველაფრისა – მე მინდა, ჩემს სამშობლოში იყოს კარგი კი არა, საუკეთესო ვაქცინა. ეს დანაშაულია, რომ შენი მეგობრებისთვის, ნათესავებისთვის, ახლობლებისთვის საუკეთესო გინდოდეს?! მინდა, ვეცდები და იქნება კიდეც!

იმედი მაქვს, რომ სექტემბერ-ოქტომბერში ევროპიდან საქართველოში კარგი ვაქცინები შემოვა, რომელიც უკეთ დაიცავს მოსახლეობას.

რჩევა ჩემი მეგობრებისთვის – ჩინურ ვაქცინას ვინც გაიკეთებთ, ვაქცინირების შემდეგ პირბადე არ მოიხსნათ. დაინფიცირების რისკი უფრო მეტია, ვიდრე „ფაიზერის“ შემთხვევაში, თუმცა მძიმედ არ დაავადდებით.

ასევე მივმართავ ქრონიკული დაავადებების მქონე პირებს – აუცილებლად უნდა აიცრათ.

რომ გითხრათ, ჩინურ ვაქცინებზე „ვგიჟდები“ – არა! მაგრამ ის, რაც მოხდა „სინოვაკის“ შემთხვევაში, წინგადადგმული ნაბიჯია და გვიჩვენებს, რომ ვაქცინის მწარმოებლები ვეღარ გააგრძელებენ „ჩალიჩს“ – მოუწევთ, დადონ კარგი კვლევები. და ეს ჯანმოს წყალობით. ჩვენ კი ჯანდაცვის მსოფლიო ორგანოზაციის ნებართვის გაცემამდე დავიწყეთ „სინოვაკით“ ვაქცინაცია, რაც არასწორი იყო, მაგრამ რაც მოხდა – მოხდა!

კიდევ ერთხელ გავიმეორებ – „სინოვაკისთვის“ ავტორიზაციის მინიჭება არის ფრთხილი კარგი ამბავი!

ასევე კარგი ამბავი არის ის, რომ, ალბათ, მალე ევროპის წამლის სააგენტო მიიღებს დადგენილებას 12 წლის ასაკიდან „ფაიზერით“ ვაქცინაციის შესახებ;

უმაგრესი ამბავია ის, რომ აშშ-ში უკვე მიდის 2 წლის ასაკიდან ბავშვებში კლინიკური კვლევები „ფაიზერზე“;

რაც შეეხება “შავ სოკოს“, ეს პირველად გავრცელდა ინდოეთში, მუმბაიში. საქართველოსთვის ნაკლებად საშიშია. ამ კუთხით ინდოეთში არის ბევრი კომბინაცია – სიღარიბე, სიბინძურე, სიცხე. ტროპიკული დაავადებები და ა.შ. ის საქართველოს ნაკლებად ემუქრება, რადგანაც ძირითადად ტროპიკული ქვეყნების პრობლემაა.

მჯერა, კორონავირუსს დავამარცხებთ, მაგრამ უნდა დავამარცხოთ სიმართლით და არა ტყუილებით. დინჯი, პრაგმატული ნაბიჯებით, პროფესიონალიზმით, რომლის ნაკლებობაც გვაქვს თითქმის ყველა მიმართულებით. პროფესიონალიზმი – ეს არის ერთადერთი გზა, რომ გამოვიდეთ ჩიხიდან.

ვირუსი დაახლოებით 6 თვეში მორჩება, სექტემბერში ერთ კუდს მოიქნევს და დამთავრდება, მაგრამ შემდეგ ჩვენ უნდა ავამუშაოთ დაპაუზებული ქვეყანა, რასაც დამოუკიდებელი, არაპოლიტიკური, არაანგაჟირებული პროფესიონალები სჭირდება!

ასეთი პროფესიონალები საქართველოში ბევრნი არიან. ასევე ქვეყანაში გვაქვს ძალიან ბევრი კარგი კლინიკა, დღეს რამდენიმეს წარმომადგენლებთან მქონდა საუბარი.

კიდევ ერთი ძალიან კარგი ამბავი – დღეს საქართველოში კიდევ ერთი სამედიცინო კლინიკა მიიღებს ფრანგული ორგანიზაციის „საქართველოს აკრედიტაციის ინიციატივა“, აკრედიტაციას.

აკრედიტაციის პროცესი წინ მიდის. რთულია, მაგრამ ვითარდება.

ყველაფერი კარგად იქნება. ჯანმრთელობას გისურვებთ.