თბილისის საქალაქო სასამართლოში, დღეს, ლაზარე გრიგორიადისის სასამართლო პროცესი გაიმართება. არსებული ინფორმაციით,  მოსამართლე ზვიად შარაძე განაჩენს დღეს გამოაცხადებს. 

"გამარჯობა და გამარჯვება ყველას! დილას 10:00 ზე გამოცხადდება განაჩენი!" - დაწერა სოციალურ ქსელში ლაზარეს დედამ, თამთა კალანდაძემ

შეგახსენებთ, რომ 8 აპრილს, თბილისის საქალაქო სასამართლოში ლაზარე გრიგორიადისის დასკვნითი სასამართლო სხდომა გაიმართა. პროცესზე დასკვნითი სიტყვა თქვეს ბრალდების და დაცვის მხარეებმა. საბოლოო სიტყვა წარმოთქვა თავად ბრალდებულმაც. გრიგორიადისი პროცესში დისტანციურად ჩაერთო.

გამოძიების ინფორმაციით, ბრალდებულმა 7 მარტს, რუსთაველის გამზირზე გამართული აქციის მიმდინარეობისას, 9 აპრილის ქუჩაზე შს სამინისტროს განსაკუთრებულ დავალებათა დეპარტამენტის თანამშრომლების მიმართულებით, ორჯერ ისროლა ე.წ. „მოლოტოვის კოქტეილი“.

ასევე, ბრალდებულმა 9 მარტს, ჭანტურიას ქუჩაზე, განზრახ წაუკიდა ცეცხლი შინაგან საქმეთა სამინისტროს კუთვნილ ავტომანქანას, რომელიც ადგილზე დაიწვა. ამ ქმედების შედეგად, სახელმწიფო ბიუჯეტს 39 500 ლარის ქონებრივი ზიანი მიადგა.

დანაშაული სასჯელის ზომად 7-დან 11 წლამდე თავისუფლების აღკვეთას ითვალისწინებს.