სალომე ზურაბიშვილი საკონსტიტუციო ცვლილებებზე: ესაა პროგრესისკენ, დემოკრატიისა და სტაბილურობისკენ გადადგმული სერიოზული ნაბიჯი

0
41

ეს არის ჩვენი პროგრესისკენ, დემოკრატიისა და სტაბილურობისკენ გადადგმული სერიოზული ნაბიჯი და ასევე, სერიოზული ნაბიჯი იმ არჩევნების დღისკენ, რომელიც გველოდება ოქტომბერში, – განაცხადა საქართველოს პრეზიდენტმა, სალომე ზურაბიშვილმა საკონსტიტუციო ცვლილებების შესახებ კანონპროექტის მესამე მოსმენით მხარდაჭერის შეფასებისას.

„მე მივიჩნევ თავს ვალდებულად, არა მხოლოდ კონსტიტუციით, არამედ – მორალურადაც, ყველაფერი გავაკეთო იმისთვის, რომ სტაბილურად მივიდეთ არჩევნების დღემდე. ამისთვის გადავდგი თავის დროზე ის მძიმე, რთული ნაბიჯი, რომელსაც ერქვა შეწყალება. მე ეს გადაწყვეტილება არ მიმიღია იმის გამო, რომ რომელიმე შეთანხმებაში ეწერა რამე, რომელშიც მე არ ვმონაწილეობდი და არ ვთვლიდი, რომ ვიყავი პასუხისმგებელი, მე მივიღე ეს გადაწყვეტილება იმიტომ, რომ ეს ემსახურებოდა ქვეყნის სტაბილურობას. დღეს სწორედ გამყარდა ქვეყნის სტაბილურობა. არ შეიძლება, ხაზი არ გავუსვა ელჩების, ფასილიტატორების როლს ამ პროცესში. მადლობა მათ, რადგან მათი ჩართვა იყო ნაბიჯი ამ სტაბილურობის გასამყარებლად“ – განაცხადა სალომე ზურაბიშვილმა.

პარლამენტმა საკონსტიტუციო ცვლილებებს კენჭი მესამე მოსმენით დაამტკიცა. კანონპროექტს მხარი დაუჭირა 117-მა დეპუტატმა, 3-მა კი წინააღმდეგ მისცა ხმა. კენჭისყრაში „ნაციონალური მოძრაობა“ და ევროპული საქართველო“ არ მონაწილეობდა.

ცვლილებებს პრეზიდენტმა ხელი უკვე მოაწერა.

პაკეტის მიხედვით, 2020 წლის საპარლამენტო არჩევნები შერეული სისტემით ჩატარდება, რაც იმას ნიშნავს, რომ პარლამენტში აირჩევენ 120 წევრს პროპორციული და 30 წევრს მაჟორიტარული საარჩევნო სისტემით.

ცვლილებების თანახმად, პროპორციული არჩევნები ჩატარდება ერთპროცენტიანი საარჩევნო ბარიერით, საარჩევნო ბლოკებისთვის კი ბარიერი განისაზღვრება ერთი პროცენტისა და ბლოკში შემავალი პარტიების ნამრავლით. ასევე, გაუნაწილებელი მანდატები, თუ ასეთი იქნება, თანმიმდევრობით განაწილდება უდიდესი ნაშთის მქონე პარტიებზე და ბლოკებზე.

ასევე, გათვალისწინებულია ე.წ. ჩამკეტი მექანიზმიც, კერძოდ, პარტია, რომელიც 2020 წლის საპარლამენტო არჩევნებზე პროპორციული სისტემით 40.54%-ზე ნაკლებ მხარდაჭერას მიიღებს, მთავრობას დამოუკიდებლად ვერ ჩამოაყალიბებს.

LEAVE A REPLY

Please enter your comment!
Please enter your name here