თამილა ლაფანაშვილმა ოს ხალხს მიმართა – მჯერა, გაუგებრობები და პრობლემები, რაც ჩვენს ურთიერთობაში გვქონდა, ვაჯკაცობისა და ტოლერანტობის გამოღვიძებით ისევ მოგვარდება

0
206

საოკუპაციო ხაზთან, სოფელ ოძისში, ექიმ ვაჟა გაფრინდაშვილის მეუღლემ განცხადება გააკეთა და ექიმის მხარდამჭერებს, გულშემატკივრებს გვერდში დგომისთვის მადლობა გადაუხადა.

თამილა ლაფანაშვილის თქმით, მხარდაჭერა, რომელსაც მოქალაქეებისგან გრძნობენ, ოჯახს და თავად ვაჟა გაფრინდაშვილს აძლიერებს.

„მეგობრებო, გულშემატკივრებს და უბრალოდ იმ ადამიანებს მინდა, მოგმართოთ, ვინც იზიარებთ ვაჟას გამონათქვამებს, ვაჟას პრინციპებს, უღრმესი მადლობა ყველას, რომ გვერდში დაგვიდექით, გაიზიარეთ ჩვენი ეს პრობლემა, ჩვენ ასე ვთვლით, თორემ მემგონი, ვაჟა იქ არ თვლის ამას პრობლემად. ძალიან დიდი მადლობა ყველას, რომ ამ შორ მანძილზე წამოგვყევით. მხარდაჭერა, რომელსაც ვგრძნობთ, ჩვენს ოჯახს, მეგობრებს და პირველ რიგში ვაჟას, ძალიან აძლიერებს. დარწმუნებული ვარ, ის ალბათ გრძნობს ჩვენს ენერგეტიკას. ყველაზე ახლოს ვართ ჩვენ ახლა მის, ასე ვთქვათ, საპატიმრო დაწესებულებასთან. პირველ რიგში, მინდა, გითხრათ, რომ ჩვენ აქედან გავაგონებთ ჩვენს ამ გულისტკივილს და დარწმუმებული ვარ, რომ ის მხნედ იქნება. ჩვენთვიას ეს ძალიან მნიშვნელოვანია, რომ მალე დაგვიბრუნდეს და იყოს ჯანმრთელად, ჯანსაღად“ ,- განაცხადა თამილა ლაფანაშვილმა.

ამასთან, ვაჟა გაფრინდაშვილის მეუღლემ სოფელ ოძისიდან ოს ხალხს მიმართა.

„ყველაზე უმნიშვნელოვანესი, მინდა, მივმართო ჩვენს გვერდით მცხოვრებ ოს ხალხს. საუკუნეებია, ჩვენ ვცხოვრობთ კავკასიაში, ერთი ცის ქვეშ და დარწმუნებული ვარ, რომ მრავალი საუკუნე ისევ ასე გაგრძელდება. ჩვენი ურთიერთობა ყოველთვის ემყარებოდა ვაჟკაცობისა და ტოლერანტობის პრინციპებს. მინდა და მჯერა, ის გაუგებრობები  და პრობლემები, რაც გვქონდა ჩვენს უერთიერთობაში, ისევ მოგვარდება ამ პრინციპების, ვაჯკაცობისა და ტოლერანტობის გამოღვიძებით. მინდა, მივმართო, რომ ვაჟა რასაც ემსახურება, ეს არის პირველ რიგში ადამიანების ჯანმრთელობაზე ზრუნვა და მათი დაცვა. ვინც მას იცნობს, მას მთელი ცხოვრების განმავლობაში მეტი არაფერი გაუკეთებია, მხოლოდ დახმარება და იციან, როგორი დახმარება, გვერდში დგომა იცის მან, მითუმეტეს პაციენტებზე ზრუნვა. ამიტომ, სრულიად წარმოუდგენლია, რომ ის ამ თავისი საქციელის გამო, ზის გამოკეტილი და ვიცით ჩვენ, რა საშინელ პირობებში. შეიძლება, პირობები ნორმალური აქვს, მაგრამ ის, რომ იმყოფება თავის სამშობლოში და ციხეში, თავისი ჰუმანური მისიის გამო, ეს გვანადგურებს ჩვენ, მის ოჯახის წევრებს და ახლობლებს“ ,- განაცხადა ვაჟა გაფრინდაშვილის მეუღლემ.

საოკუპაციო ხაზთან ექიმ ვაჟა გაფრინდაშვილის მხარდასაჭერი აქცია მიმდინარეობს. სოფელ ოძისთან აქციის მონაწილეები ცოტა ხნის წინ ჩავიდნენ.

აქციის მონაწილეები პირველი რესპუბლიკის მოედანზე დილიდან შეიკრიბნენ და საოკუპაციო ხაზისკენ გაემართნენ.

აქციის მონაწილეებს შორის ოჯახის წევრების გარდა, ექიმის კოლეგები, რიგითი მოქალაქეები და პოლიტიკური პარტიების წარმომადგენლები იმყოფებიან.

ექიმი ვაჟა გაფრინდაშვილი უკვე ერთ თვეზე მეტია, ცხინვალის იზოლატორში პატიმრობაში იმყოფება. ექიმი 9 ნოემბერს დააკავეს.

ოკუპანტები ვაჟა გაფრინდაშვილს ე.წ. საზღვრის კვეთაში სდებენ ბრალს, თუმცა გაფრინდაშვილი აცხადებს, რომ საქართველოს ტერიტორიაზე საზღვრებს არ აღიარებს და შესაბამისად, არც ბრალს აღიარებს.

ოკუპირებულ ცხინვალში 13 დეკემბერს ვაჟა გაფრინდაშვილის ე.წ. სასამართლო პროცესი გაიმართა. ცხინვალის საოკუპაციო რეჟიმმა ვაჟა გაფრინდაშვილი პატიმრობაში დატოვა.