ილია მეორე: სადაც უნდა იყოს ქართველი ადამიანი, ის ეკუთვნის საქართველოს ეკლესიას და სულიერად ემორჩილება პატრიარქს

0
214

საქართველოს კათოლიკოს-პატრიარქმა, ილია მეორემ მრევლს ანდრია პირველწოდებულისა და ვახტანგ გორგასალის ხსენების დღე მიულოცა, სამების საკათედრო ტაძარში წირვა აღავლინა და იქადაგა.

„დღეს არის ხსენება წმინდისა მოციქულისა ანდრიასი. ჩვენი განმანათლებელია, ჩვენი მომქცეველი. მან იქადაგა პირველად სახარება საქართველოში. მან მოაბრძანა ხატი წმინდა ღვთისმშობლისა“, – განაცხადა პატრიარქმა.

ილია მეორემ ვახტანგ გორგასლის შესახებაც იქადაგა და აღნიშნა, რომ მას განსაკუთრებული ადგილი უკავია საქართველოს ისტორიაში.

„თქვენ იცით, რომ ვახტანგ გორგასალის თხოვნით და მისი შუამდგომლობით ანტიოქიის პატრიარქმა უბოძა საქართველოს მეთაურს კათოლიკოსის წოდება. ეს მხოლოდ ანტიოქიის პატრიარქს შეეძლო. სიტყვა კათოლიკოსი წარმოდგება ბერძნული სიტყვისაგან ,,კათოლ“ – „საყოველთაო“. ე.ი., სადაც არ უნდა იყოს ქართველი ადამიანი, ის ეკუთვნის საქართველოს ეკლესიას და სულიერად ემორჩილება საქართველოს პატრიარქს.

მე-11 საუკუნეში იყო კანონისტი მალსაბონი. შემდეგ ეს მალსაბონი გახდა პატრიარქი ანტიოქიისა. მალსაბონი წერს, რომ საქართველოს ეკლესიას პეტრეს დროს მიენიჭა ავტოკეფალია და დამოუკიდებლობა. ჩვენ დიდი ბრძოლა დაგვჭირდა იმის დამტკიცებაში, რომ რომელი პეტრე იყო საქართველოში. ზოგიერთი ამბობდა, რომ ეს ეკუთვნის მე-11 საუკუნეს და პეტრე მალსაბონი ამბობს, რომ ნეტარი პეტრეს დროს საქართველოს და კვიპროსს მიენიჭა ავტოკეფალია. ეს სიტყვა მეტყველებს იმაზე, რომ ეს შორეულ წარსულში იყო, მე 11-საუკუნეში კი არა, არამედ მეხუთე საუკუნეში, გორგასალის დროს“, – განაცხადა პატრიარქმა.

მისივე თქმით, მოციქულ ანდრია პირველწოდებულის დროს, მეოთხე საუკუნეში ქრისტიანობა გახდა სახელმწიფო რელიგია და მეხუთე საუკუნეში საქართველოს ეკლესია გახდა ავტოკეფალური, დამოუკიდებელი.

პატრიარქმა დღესვე მოჭიდავეები, ასევე გორის სახელმწიფო სასწავლო უნივერსიტეტის ლექტორები და თამარ მეფის სკოლის მოსწავლეები დალოცა.